Alén do material e do racional

Velaquí un libro para tomar conciencia da Realidade desde unha visión holística, desde o coñecemento cosmoteándrico, un libro para aprender a sermos seres humanos coa mente aberta a todo o que nace da sabedoría, para aprender, en definitiva, a estar e a vivir no mundo. Tamén é un libro que nos convida ao longo das súas case trescentas páxinas a múltiples lecturas, algunhas delas de difícil comprensión para moitos e moitas de nós. É un libro de fin dunha longa viaxe polo saber humano, desde a filosofía grega e as milenarias filosofías orientais ao pensador francés Edgar Morin, desde os textos bíblicos á encíclica Laudato si, desde Francisco de Asís a Raimon Panikkar, desde Xesús de Nazaret ao gran poeta místico san Juan de la Cruz, desde a física cuántica á bioética de Van Rensselaer Potter. Só unha mente privilexiada e cultivada día a día sen prexuízos como a de Victorino Pérez Prieto (Hospital de Hórbigo-León, 1954) pode darnos unha obra ensaística tan rica, lúcida e luminosa como A unidade e a harmonía da Realidade. Complexidade e ecoloxía. A unidade e a harmonía da realidade / Vitorino Pérez Prieto / Galaxia / 2021 / 284 páxs. / 22,05 euros En diálogo coas culturas primitivas, coa ciencia, coas relixións, coa filosofía, coa teoloxía, co ecoloxismo, nutríndose dunha amplísima bibliografía, procurando unha cosmovisión interrelacional, Pérez Prieto sitúanos fronte á Realidade como un tecido sen costuras, en feliz expresión popularizada polo antropólogo e filósofo francés Bruno Latour. A Realidade como un todo relacionado, de Oriente a Occidente, que une ciencia e mística, microcosmos e macrocosmos, o racional e o transracional, o animado e o inanimado, o material e o espiritual, unha visión integral da Realidade que debe conducirnos a vivir de modo consciente, en plenitude espiritual, en harmonía coa terra da que formamos parte. Un coñecemento en profundidade da Realidade que, como di o autor, "nunca poderá ser adecuadamente descrito en palabras, porque está alén do reino dos sentidos e do intelecto". Talvez hai no libro cuestións de demasiada altura académica para os coñecementos que podemos ter a maioría de nós, mais en xeral a lectura do libro resulta amena, cunha prosa ensaística que nos abre de par en par as portas a outra dimensión do saber e que procura axudarnos a ser persoas plenamente conscientes dos desafíos actuais, persoas preocupadas pola casa común fronte a un sistema inxusto e depredador, persoas comprometidas coa busca da harmonía entre nós e o conxunto do Universo, persoas marabilladas coa creación e que se achegan con respecto e con asombro á sabedoría de Lao Tse, do xefe indio Seattle e doutros sabios anteriores ao cristianismo, que saben admirar os relatos bíblicos ou a encíclica Laudato si do papa Francisco, que, por certo, son temas estes dous últimos moi amorosamente tratados no libro. A obra remata cunha moi brillante contribución á teoloxía, abordando, máis unha vez, a ecoteoloxía e a ecoespiritualidade, esa necesaria reconciliación coa natureza e o cosmos, imprescindíbel para refacer as nosas vidas e recompoñer a harmonía rota.