"Unha zorra máis con cans non vai resolver o problema": Trump búrlase do Exército de Dinamarca e da defensa de Groenlandia
O presidente estadounidense volveu ironizar sobre a capacidade militar danesa e a protección de Groenlandia, cuestionando que poidan defenderse sen apoio externo e empregando un ton despectivo e cargado de estereotipos.
O presidente dos EUA, Donald Trump, burlouse publicamente do Exército de Dinamarca e da defensa de Groenlandia, ao afirmar que non pode confiar en que sexan capaces de protexerse por si sos. "Non podo confiar en que poidan defenderse sos. Despregaron unha zorra adicional tirada por cans, e logo outra máis. Pero iso non vai resolver o problema", dixo en ton sarcástico.
As declaracións producíronse nun contexto de debate sobre a seguridade no Ártico e insírense nunha serie de comentarios de Trump sobre a importancia estratéxica de Groenlandia e o papel dos aliados europeos na defensa colectiva. O mandatario volveu cuestionar a capacidade militar danesa nun territorio clave para o control da coñecida como "ruta da seda ártica" e para a presenza da OTAN na rexión.
"Os EUA necesitan a Groenlandia pola súa seguridade nacional. É vital para a Cúpula Dourada que estamos a construír", escribiu o presidente nas súas redes sociais en relación á ferramenta militar que o país prevé ter rematada para o ano 2026 e que servirá como escudo antimisís. "A OTAN debería liderar o camiño para que [Groenlandia] sexa nosa. Se non, será da China ou de Rusia, e iso non pode pasar!", engadiu, afirmando que a OTAN "é máis formidábel e valiosa" coa illa nórdica "nas súas mans". "Todo o que sexa menos ca iso é inaceptábel".
Unha unidade de elite
Se ben é certo que o Exército danés conta cunha unidade especializada que vixía Groenlandia con cans e zorras desde a II Guerra Mundial, as palabras de Trump cara ao Exército groenlandés foron amplamente criticadas polo seu ton despectivo e pola utilización de imaxes estereotipadas asociadas aos pobos indíxenas do Ártico.
Dinamarca mantén en Groenlandia unha presenza militar adaptada ás particularidades do Ártico, con unidades de elite especializadas en vixilancia, rescate e control do espazo marítimo e aéreo. Concretamente, a Patrulla Sirius encárgase de vixiar a illa máis grande do mundo en condicións meteorolóxicas extremas. Formada seis zorras, cada unha con dous homes e entre 11 e 15 cans, recorren milleiros de quilómetros durante meses facendo un recoñecemento do territorio, controlando a pesca e a minaría ilegal e exercendo a soberanía danesa nun lugar no que as temperaturas extremadamente baixas fan a supervivencia humana máis que complexa.
