Xi chega a Moscova coa guerra en Ucraína de fondo

A Casa Branca intensificou as súas críticas a un potencial alto o fogo na guerra de Ucraína desde que a pasada sexta feira se confirmou a chegada a territorio ruso onte do presidente chinés, Xi Jinping, para abordar a implementación da súa proposta de paz. John Kirby, coordinador de Comunicacións Estratéxicas do Consello de Seguridade Nacional estadounidense, foi o encargado de reiterar nos últimos días que un alto o fogo sería “inaceptábel posto que o único que fará será ratificar as conquistas de Rusia até o momento”. Nese sentido, cuestionou a amizade entre Beijing e Moscova, insistindo en que un alto o fogo abriría a porta a que o Exército ruso “reconstrúa e actualice as súas forzas para reiniciar os ataques a Ucraína cando queira”. Xa desde a presentación da proposta de paz chinesa, tanto os Estados Unidos como a Unión Europea e a Organización do Tratado do Atlántico Norte (OTAN) desestimaron a iniciativa para acabar coas hostilidades, que Kíiv se comprometeu a analizar, e comezaron a advertir sobre unha suposta intención chinesa de vender armas letais a Moscova para combater en Ucraína. Aínda así, os medios estadounidenses apuntaron que Xi conversará co seu homólogo ucraíno, Volodimir Zelenski, para tratar a proposta. A pesar das declaracións de Kirby, os altos responsábeis militares do país e da alianza militar recoñecen que é case imposíbel que as Forzas Armadas ucraínas poidan recuperar o territorio que controlaban ao comezo da invasión rusa hai máis dun ano, recolle Foreign Policy, unha situación admitida polo xefe do Estado Maior de Washington, o xeneral Mark Milley, ou o ex xeneral alemán Harald Kujat, que liderou o Comité Militar da OTAN. Arredor desta cuestión, medios especializados reportaron en distintas ocasións a carencia de munición das tropas ucraínas, amais dun alto nivel de perdas humanas e materiais na defensa de Bakhmut, en Donetsk, que dificultaría lanzar unha contraofensiva cando conten coas novas achegas de armamento da OTAN, todo no contexto dos avances rusos ao longo da liña da fronte nos últimos meses. En marzo de 2022, pouco despois de que dera inicio a invasión, Kíiv e Moscova estiveron perto de asinar un acordo para frear as hostilidades no que Ucraína renunciaba a incorporarse á OTAN, mais os Gobernos británico, estadounidense, alemán e francés decidiron bloquealo “para seguir golpeando a [o presidente ruso, Vladimir] Putin”, sinalou o daquela primeiro ministro de Israel, Naftali Bennet, que actuaba como mediador. Nesta ocasión, e malia o éxito chinés á hora de impulsar a normalización de relacións entre Irán e Arabia Saudita, “queda por ver se poderá ter éxito como mediador, pois algúns analistas din que a China non ten suficiente influencia cando se trata de Ucraína”, resolve Al Jazeera. En todo caso, Kíiv e os seus aliados coincidiron en reclamar a Beijing que prema Moscova na visita oficial para que acabe coa guerra. Reunión en Rusia O mandatario chinés reuniuse onte con Putin na súa primeira saída após ser reelixido á fronte do país por segunda vez para debater ademais da situación en Ucraína a cooperación técnico-militar e enerxética, informou o Kremlin. Está previsto que sexan asinados máis dunha decena de documentos en varios ámbitos de cooperación e dúas declaracións conxuntas. Asemade, ambos os dous presidentes volverán xuntarse hoxe antes da fin da visita oficial mañá. O voceiro do Ministerio de Asuntos Exteriores de Beijing, Hua Xhunying, defendeu o carácter diferencial do modelo de relacións sino-rusas, censurando os membros da OTAN por “avivar a confrontación entre bloques e mais participar en prácticas hexemónicas, dominantes e intimidatorias”. Pola súa parte, o xornal chinés Global Times fixo fincapé en que as relacións mutuas se basean en “non alianza, non confrontación e non ser usadas para atacar un terceiro país, e agora engadiuse outra frase, non tolera inxerencias nin coaccións de terceiros”. Este modelo, que Rusia e a China vinculan coa idea do multilateralismo como alicerce do Goberno global contraposto ao intento de hexemonía que atribúen a Washington, é o da “maioría mundial”, defendeu Putin, mentres que a Casa Branca criticou as tentativas de mudar a “orde internacional” actual. Ao tempo, o presidente ruso comunicou que o país condonou 18.000 millóns de euros de débeda aos países máis vulnerábeis de África. No que atinxe á iniciativa para exportar gran ucraíno polo mar Negro, criticou que só 3% fora dirixido a África, e comprometeuse a subministrar de forma gratuíta o volume de gran adquirido no pasado por estes países no caso de que non se asine unha nova extensión do acordo á fin da última prórroga de 60 días. Orde de arresto da Corte Penal Internacional Con respecto á orde de arresto contra Putin emitida pola Corte Penal Internacional pola súa presunta responsabilidade na deportación de crianzas ucraínas das zonas controladas polos soldados rusos, o Comité de Investigación de Rusia anunciou onte a apertura dunha causa penal contra os membros do tribunal que forman parte do proceso, por unha medida que considera ilegal. A decisión, que xa fora rexeitada polo país ao non formar parte do Estatuto de Roma, polo que o organismo non ten atribucións legais en Rusia, viola os tratados que outorgan a xefes de Estado inmunidade fronte á xurisdición doutros Estados, sostén o Comité. Nesa liña, a Chancelería chinesa instou a Corte a “evitar a politización e a dobre vara de medir”. En Bruxelas, o bloque comunitario afirmou que os Estados membros deron luz verde a un investimento de 2.000 millóns de euros para enviar munición de artillaría a Ucraína e repor os arsenais da Unión Europea. Desde o comezo da invasión rusa a OTAN enviou a Kíiv material militar por valor de máis de 60.000 millóns de euros. O ex presidente de Taiwán visita a China Ma Ying-jeou, ex presidente de Taiwán, desprazarase á China do 27 de marzo ao 7 de abril para liderar un grupo de estudantes taiwaneses na celebración do Día de Varrido das Tumbas, confirmou Beijing. Malia que non están previstas reunións coas autoridades, a viaxe é histórica ao ser a primeira vez que un ex mandatario taiwanés viaxa ao continente. Ma considérase máis achegado a Beijing que a súa sucesora, a actual presidenta Tsai Ing-wen. Desde que Tsai chegou ao poder en 2016, oito países retiraron o recoñecemento a Taipei, nove de confirmarse o anuncio feito por Honduras.