[VÍDEO] Denuncian unha brutal agresión policial no barrio madrileño de Lavapiés
Un vídeo no que se ve axentes da Policía española empregando a violencia nunha detención no barrio madrileño de Lavapiés contra dous mozos levou este sábado a representantes de Podemos e Sumar a pedir explicacións ao Ministerio do Interior polo que nas redes sociais se cualifica como "brutal violencia" ou "violencia desmedida".
Serigne Mbaye, activista social, ex deputado rexional madrileño de Podemos, e que foi a voz do sindicato de 'manteros', denunciou o ocorrido desde redes sociais: "Así até cando? Cal é a xustificación desta actuación tan violenta? O acoso e a violencia policial en Lavapiés non ten nome. Espero que o Ministerio do Interior, a Policía Nacional e o Defensor do Pobo tomen medidas antes de que sexa tarde". Interior xustifica a intervención na violencia coa que, apunta, actuaron os 2 mozos.
O vídeo viralizouse en redes sociais nas últimas horas e recolle o que apunta a unha agresión no madrileño barrio de Lavapiés por 2 axentes da Policía Nacional a 2 mozos, con asañamento e sen responder a un protocolo comedido, lóxico de actuación, e sen contención da forza exercida.
A gravación tamén foi difundida pola SOS Racismo Madrid. A organización asegura nunha mensaxe en Instagram que un dos axentes implicados é “bastante coñecido no barrio polas súas actitudes sempre violentas cara ás persoas racializadas”.
O deputado de Sumar Iñigo Errejón rexistrou unha petición no Congreso para que o Ministerio do Interior responda pola actuación policial. "Pódese percibir asañamento”, di o escrito asinado por Errejón, “que non parece responder a un protocolo comedido de actuación policial”. O documento engade que “os veciños e veciñas do barrio de Lavapiés veñen denunciando a existencia de violencia policial contra persoas migrantes”.
A deputada de Unidas Podemos, Ione Belarra, pola súa parte, tamén difundiu o vídeo na súa conta de X e cualificou os feitos de “violencia policial absolutamente gratuíta e inxustificada que se repite contra as persoas racializadas” e engade que “non pode ter cabida nunha democracia”.