A taxa de paro da Eurozona ficou o pasado novembro en 7,2%, unha décima menos que o mes anterior e nove décimas por baixo do mesmo mes de 2020, mentres no conxunto da Unión Europea (UE) caeu a 6,5%.
Así o reflicten os datos de desemprego que vén de actualizar a plataforma estatística comunitaria Eurostat, que deixan o Estado español coa maior taxa entre os Vintesete.
O dato de paro rexistrado en novembro de 2021 representa a mellor lectura do dato en ambas as zonas desde marzo de 2020, o primeiro mes no que se introduciron restricións para conter o espallamento do coronavirus.
A oficina estatística europea calcula que 13,98 millóns de persoas carecían de emprego na UE en novembro de 2021, dos que 11,83 millóns se atopaban na Eurozona —países que utilizan o euro como moeda—.
Entre os Vintesete estados membro, a maior taxa corresponde ao Estado español, cun dato de 14,1% (tres décimas menos), seguido de Grecia, con 13,4%, e Italia, con 9,2%. No extremo oposto da táboa fican a República Checa (2,2%), Países Baixos (2,7%) e Polonia (3%).
No caso da Galiza, segundo os datos máis recentes, os da Enquisa de Poboación Activa (EPA) do terceiro trimestre de 2021, a taxa de desemprego é de 10,2%.
O paro xuvenil baixa de 30%
Por outra parte, no conxunto do Estado español a taxa de paro xuvenil —menores de 25 anos— era de 29,2%, fronte a 30,2% de outubro de 2021. É a primeira vez desde novembro de 2008 que a cifra baixa do limiar de 30%.
Con todo, a taxa española foi a segunda máis elevada da UE para a xente moza, só superada por Grecia (39,1%) e seguida de Italia (28%). Na Galiza, con base na EPA, a taxa é de 24,3%.
