O presidente do Goberno do Estado, Pedro Sánchez, pediu este domingo aos presidentes dos diferentes territorios que faciliten unha listaxe de infraestruturas para poder aloxar a contaxiados polo coronavirus pero que están asintomáticos, co fin de evitar que poidan contaxiar a outras persoas, segundo informaron a Europa Press.
Sánchez leva reunido desde as dez e media da mañá por videoconferencia cos presidentes no que é o seu cuarto encontro desde que se decretou o estado de alarma o pasado 14 de marzo pola pandemia de coronavirus.
O presidente estatal pediulles que esta listaxe estea concluída antes do próximo 10 de abril, xusto cando finaliza a Semana Santa e os traballadores de sectores non esenciais volverán incorporarse aos seus postos de traballo, segundo anunciou onte o propio Sánchez.
Durante estes encontros, a maior parte dos presidentes fóronlle trasladando o seu malestar pola falla de material e no último encontro, o domingo pasado, varios presidentes expuxeron as súas críticas por aprobar un decreto para paralizar as actividades non esenciais sen contar con eles.
EN AMPLIACIÓN