O Ministerio de Saúde de Rusia puxo en circulación o primeiro lote da vacina contra a Covid-19 desenvolvida no país e bautizada como Sputnik V, despois de conseguir completar as probas de calidade requiridas.
"O primeiro lote da vacina Sputnik V pasou as probas de calidade necesarias dos laboratorios do Servizo Federal de Vixilancia no Sector de Saúde e foi lanzado á circulación pública", segundo sinalou o ministerio nun comunicado recollido pola axencia de noticias Sputnik.
Xa na segunda feira, o ministro de Sanidade, Mijail Murashko, anunciou que a vacina comezaría a ser administrada durante esta semana ás primeiras persoas voluntarias, no marco da terceira fase dos ensaios clínicos despois do seu rexistro.
A Oficina Nacional de Protección ao Consumidor de Rusia (Rospotrebnadzor) informou de que as probas, realizadas polo centro de viroloxía e biotecnoloxías Vector, estarían completas o próximo 30 de setembro.
As autoridades rusas rexistraron oficialmente o 11 de agosto a primeira vacina contra a Covid-19, desenvolvida polo Centro de Epidemioloxía e Microbioloxía Gamaleya.
A Sputnik V non provoca efectos secundarios graves consegue xerar inmunidade durante un período que pode alcanzar até os dous anos. Na fase actual, estase a administrar nas probas cunha autorización especial, tan só a persoas dos grupos de risco e baixo un estrito control.
Terceiros países
Tras a publicación na pasada sexta feira dos resultados das primeiras probas clínicas na revista científica The Lancet, o presidente do Fondo Ruso de Investimento Directo (RDIF), Kirill Dmitriev, dixo en conferencia de prensa que "estamos a traballar activamente con moitos países para producila fóra de Rusia", e citou o Brasil e a India.