Protestas contra o golpe de Estado no Sudán mentres os militares perden marxe de manobra

Nos vindeiros días haberá unha nova onda de mobilizacións masivas nas principais cidades do Sudán. Cos militares con cada vez menos apoios, as Forzas da Liberdade e o Cambio procuran reverter con manifestacións pacíficas o golpe de Estado.
Mobilizacións o pasado 30 de outubro en Khartún, capital do Sudán, rexeitando o golpe de Estado. (Foto: Twitter)
photo_camera Mobilizacións o pasado 30 de outubro en Khartún, capital do Sudán, rexeitando o golpe de Estado. (Foto: Twitter)

Desde que o 25 de outubro os militares arrestaron o primeiro ministro, Abdalla Hamdok, e os ministros civís do Consello Soberano de Transición do Sudán, disolvendo o órgano ao tempo que tomaban as principais institucións gobernamentais, as instalacións de radio e televisión e interviñan as comunicacións; multiplicáronse as protestas por todo o país para exixir ao Exército que respecte os acordos para a transición democrática.

Até o de agora, 12 persoas morreron froito da represión das Forzas Armadas do país africano, ás que hai que sumar 280 persoas feridas, segundo reporta o Comité de médicos do Sudán.

Porén, a mobilización mantense. A quinta e sexta feira Khartún, a capital, acolleu a milleiros de persoas en pé contra o golpe de Estado, amais, mañá e pasado mañá está preparada unha onda de protestas nas principais cidades á beira de edificios oficiais e militares, así como de infraestruturas críticas, organizada pola Asociación profesional sudanesa (SPA), a plataforma de organizacións profesionais que encabezou a revolta que acabou coa ditadura de Omar al-Bashir en 2019.

Precisamente, a resistencia pacífica é a estratexia impulsada desde o 25 de outubro polas asociacións e partidos que xa se opuxeran primeiro a Al-Bashir e agora ao novo líder do país, Abdel Fattah Al Burhan, xeneral do Exército e presidente do extinto Consello Soberano de Transición. Estas entidades están agrupadas nas Forzas da Liberdade e o Cambio, na que xunta o SPA están formacións como o Partido Comunista, o Partido Árabe Socialista Ba'ath ou o Partido do Congreso Sudanés.

As mulleres están a desenvolver un papel determinante no movemento, apunta a BBC, nun bienio no que malia a desigualdade de xénero e a violencia sexual que seguen a sufrir, acadaron certos avances como a prohibición da mutilación xenital ou unha cota do 40% no Consello Lexislativo de Transición, sostivo Sulaima Ishaq al Jalifa, directora da Unidade contra a Violencia de Xénero no gabinete deposto.

Xunta as persoas novas, as mulleres xa lideraran o movemento prodemocracia no medio dunha forte represión, como a que deixou máis de 100 falecidas ao disparar o Exército para dispersar as protestas o 3 de xuño de 2019 en Khartún.

Os militares, cada vez máis febles

Al-Burham conversou esta quinta feira con Antony Blinken, secretario de Estado dos Estados Unidos, co que acordou acelerar a formación dun novo Goberno. “As dúas partes coincidiron na necesidade de manter o camiño da transición democrática e de completar as estruturas do Executivo de transición”, transmitiu a axencia sudanesa de noticias, SUNA.

Con  todo, Ned Price, voceiro do Departamento de Estado, engadiu que Blinken lle reclamou a liberación dos membros do Executivo detidos, entre eles Hamdok, e “regresar a un diálogo que o devolva ao seu cargo e restabeleza a gobernabilidade liderada por civís no Sudán”.

Neste sentido, os militares ordenaron liberar o ministro de Información e Cultura, de Comunicacións, de Comercio e Cooperación Internacional, e de Xuventude e Deportes. Al-Jazeera confirmou onte que xa non estaban baixo arresto.

As institucións exixen volver á situación previa

Malia que Volker Peretz, Representante especial da ONU no Sudán, defendeu que o escenario máis probábel é que se restaure a alianza entre civís e militares, formando un novo Consello Soberano dirixido polo primeiro ministro deposto Abdalla Hamdok, as forzas na rúa rexeitan esta postura, destaca Al Jazeera, optando polo retorno á situación previa ao golpe, que tamén defenden institucións como a Unión Africana, a Liga Árabe ou a Unión Europea.

A INFORMACIÓN GALEGA ESTÁ NA TÚA MAN!

Subscríbete ao noso boletín de novas.

Date de alta de balde e recibirás unha selección dos nosos artigos para saberes o que acontece.

comentarios