Pablo González, liberdade xa!

O 21 de febreiro de 2022, Pablo González anunciaba un 'Especial Ucraína' no informativo Sen Accionistas, no canle de Twitch de @Spanish Revo xunto a J. Teixeira (fotógrafo). Ao día seguinte poñía un chío en éuscaro e castelán chamando á "Xente de Elantxobe, Urbaibai, Bizkaia, EH, etc. para falar da crise entre Ucraína e Rusia". Cinco días despois, o 28 de febreiro ás sete da mañá, era detido en Przemysl, a 13 quilómetros da fronteira con Polonia, acusado de espiar para Rusia cando cubría como xornalista a chegada dos primeiros refuxiados ucraínos. Dende entón, Pablo González permanece na cadea de Radom en réxime de illamento. E o Goberno de Pedro Sánchez, calado. As autoridades de Polonia, onde goberna o PIS –Lei e Xustiza, partido de extrema dereita que dirixe Kaczynski– di que Pablo González Yagüe é axente do GRU –Servizo Secreto do Exército ruso– sen aportar ningunha proba, agás dous pasaportes pola súa dupla nacionalidade: española e rusa. Moi fácil de entender, é 'neto dun neno da Guerra Civil'. Nun documento aparece co nome de Pablo e no outro co nome de Pavel Rubtson, que súa nai cambiou polo actual cando se trasladaron ao País Vasco tras divorciarse de seu pai. A outra sospeita polaca é outra brincadeira: o diñeiro –350 euros mensuais– que seu pai ruso asina nunha transferencia bancaria á familia de Pablo González, residente en Gernika. Cantidade ridícula, digo eu, para o pago dunha actividade de espionaxe a favor do todopoderoso Putin. Tamén a ABW (Servizos de Seguridade Interior) acusa González de usar o seu estatuto como xornalista para viaxar libremente por Europa e polo mundo, coa finalidade "de desenvolver actividades para o Servizo Ruso de Intelixencia Militar". Oihana Goiriena, compañeira de González e nai dos seus tres fillos, nega que seu marido traballe para a espionaxe rusa: "A única relación que ten con Rusia é familiar porque seu pai está alí". Goiriena confirmou en Valladolid o 29 de abril de 2023 un sospeitoso contacto de axentes da Policía Nacional e do Centro Nacional de Intelixencia (CNI) dependente do Ministerio de Defensa con ela no País Vasco. "Foi pouco antes de que Pablo partise para a fronteira con Polonia, cousa que fixo ao día seguinte de que estoupase a guerra Rusia-Ucraína. Despois non souben nada máis do CNI". O presidente Pedro Sánchez só falou o 6 de abril de 2022 de Pablo González nunha resposta ao Grupo Parlamentario EH-Bildu. Sánchez só dixo que o seu Goberno segue "con moita atención" o caso. Pola súa parte, o ministro de Exteriores, José Manuel Albares, o 3 de febreiro de 2023, no programa 'Al rojo vivo' de La Sexta, dixo: "Os cargos contra el son moi graves". Chama a atención o silencio que envolve o caso en certas instancias. Pola contra, a detención de Evan Gershkovich o 30 de marzo de 2023 na cidade de Ekaterimburgo, na rexión dos Urais, mereceu unha páxina impar en El País. O mesmo medio, no mesmo espazo, o 19 de abril informou de que Moscova mantiña en cadea a Evan, tamén acusado de espionaxe, aínda que neste caso por Rusia, e o xornalista detido traballa para The Wall Street Journal con sede en Nova York e non para Gara –onde colabora Pablo González–. O vindeiro 24 de maio remata unha nova prórroga, a cuarta, da detención do xornalista vasco Solidariedade González estudou filoloxía eslava e xornalismo dixital. É un profesional freelance, con colaboracións habituais no citado Gara, La Sexta e Público. Entende o xornalismo á vella usanza: como ferramenta de explicación e entendemento. Non só espectáculo. A súa detención por axentes da ABW activou a solidariedade entre as organizacións políticas, sociais e profesionais. A portavoz do Grupo Parlamentar EH-Bildu Mertxe Aizpurua preguntou ao Goberno o 4 de abril de 2022. Os representantes de BNG, EH Bildu, Unidas Podemos, ERC, PNV, Junts e CUP concentráronse ante o Congreso pola liberdade do xornalista. Non existen precedentes dun xornalista dun Estado membro do espazo comunitario, preso nun Estado membro do espazo comunitario, como ten denunciado a vicepresidenta de Reporteiros Sen Fronteiras Edith Rodríguez. A Federación Internacional de Periodistas e a Federación Europea de Periodistas esixen ao Goberno polaco que retire os cargos e libere a González xa. Amnistía Internacional chamou a atención do réxime de illamento no que se encontra. Oihana Goiriena e amigos teñen a Asociación Free Pablo González para darlle voz ao xornalista ante o valado de silencio. En Polonia, unha persoa pode estar en detención preventiva até dous anos. De manter as autoridades o cargo de espionaxe, Pablo González podería ser condenado a dez anos de cadea. Polo momento, o xornalista estará detido até o vindeiro 24 de maio, data na que remata unha nova prórroga da súa detención. Leva catro.