A Organización de Cooperación de Shanghai aborda a folla de ruta para a próxima década

Xefes de Estado e de Goberno de máis de 20 países e líderes dunha decena de organismos internacionais participarán a partir do domingo na 25ª cimeira da Organización de Cooperación de Shanghai (OCS), trasladou a organización dun cumio que decorrerá en Tianjin, unhas das cidades máis grandes da China e con costa no mar Amarelo, no nordés do territorio. A OCS ten a súa orixe en 1996, nun pacto para xestionar a seguridade fronteiriza entre a China, Rusia, Kazakhstán, Kirguizistán e Tadjiikistán, que se formalizou en 2001 coa creación do grupo e a inclusión de Uzbequistán. Na actualidade, os membros de pleno dereito inclúen a India, Paquistán, Irán e Belarús. Tamén conta con dous estados observadores, Mongolia e Afganistán (a súa participación é limitada pola falta de recoñecemento do Goberno talibán), e 14 socios de diálogo, entre eles Turquía, Arabia Saudita, Exipto, Armenia ou Acerbaixán. Conxuntamente, destaca o país anfitrión, suman case a metade da poboación mundial, unha cuarta parte da superficie terrestre e unha cuarta parte do produto interior bruto (PIB) global. O seu obxectivo declarado é manter a seguridade rexional e promover o desenvolvemento mutuo con base no ‘Espírito de Shanghai’, un conxunto de principios que proclaman que todos os territorios deben gañar coa cooperación, a igualdade entre eles, a consulta para superar disputas ou o respecto á diversidade cultural. Até a segunda feira, cando está programada a clausura, prevese asinar unha declaración conxunta acompañada da aprobación dunha estratexia de desenvolvemento do bloque para os próximos 10 anos, explicou o ministro adxunto de Relacións Exteriores chinés, Liu Biu, que subliñou que será un dos eventos diplomáticos máis importantes deste ano. En paralelo, rubricarase un texto de conmemoración da vitoria na “Guerra Mundial Antifascista” no seu 80 aniversario, e outro polo mesmo aniversario da fundación da Organización das Nacións Unidas (ONU). Asemade, a prensa local apunta que se “adoptará unha serie de documentos finais sobre o fortalecemento da cooperación en materia de seguridade, economía, cultura e relación entre pobos”. Andrés Piqueras: "Xa non hai volta atrás ao século XX cando os Estados Unidos eran o hexemón" Liu tamén debullou que o presidente Xi Jinping presentará varias iniciativas para impulsar o desenvolvemento de alto valor engadido na OCS e propostas para salvagardar “de maneira construtiva a orde internacional posterior á Segunda Guerra Mundial” e mellorar “o sistema de gobernación global”. Fronte contra a hexemonía Con todo, a perspectiva de fortalecer unha alternativa ao que os Estados Unidos interpretan que é esa orde, na que manteñen un amplo control a múltiples niveis, será un dos eixes principais da cimeira, exemplificado na reunión que se agarda o domingo entre Xi e Narendra Modi, o primeiro ministro indio, na primeira ocasión en sete anos na que o segundo viaxará á China. Alí estará tamén Vladimir Putin, o mandatario ruso, cuxas vendas de petróleo a Nova Deli desataron un incremento a 50% dos aranceis estadounidenses aos bens indios. Aínda que fontes do Executivo do país surasiático sostiveron que confiaban en que Washington revisará o arancel adicional de 25% non hai indicios até o de agora de que se vaian reactivar as conversas. Isto freou o achegamento cara a Washington que o propio Modi protagonizara, e que non influíu nas relacións con Rusia, un socio tradicional, causando unha viraxe cara á China no medio da normalización paulatina das relacións, aínda afectadas polas disputas fronteirizas, que se reactivaron por un enfrontamento nos lindes entre as súas tropas en 2020, que deixaron como mínimo unha vintena de mortes. Tamén a China é un gran consumidor de petróleo ruso, mais tras obrigar a paralizar cadeas de produción occidentais ao restrinxir as exportacións de terras raras os Estados Unidos optaron por estender as negociacións o máximo posíbel para intentar chegar a un acordo comercial. A actual loita pola hexemonía mundial, tras a guerra arancelaria de Trump contra os Brics Modi prometeu apoio aos sectores afectados, entre as críticas gobernamentais ao país americano e aos seus aliados por unha medida que se produce mentres eles manteñen o comercio con Rusia nos sectores que lles interesan. Ademais da OCS, a outra entidade, cunha perspectiva máis global, orientada a desenvolver unha alternativa á hexemonía estadounidense é o grupo Brics, do que tamén son membros a China, Rusia e a India, así como o Brasil, que comparte con Nova Deli aranceis de 50%, mais no seu caso por levar ante a Xustiza o ex presidente ultradereitista Jair Bolsonaro pola tentativa de reter o poder por medio dun golpe de Estado. O presidente estadounidense, Donald Trump, chegou a ameazar con taxas de 100% se os Brics buscan substituír con outra moeda o papel que xoga o dólar estadounidense nas finanzas globais, e logo cun “arancel adicional de 10% a calquera país que se aliñe coas políticas anti estadounidenses dos Brics”, xusto durante a cimeira da entidade en xullo en Rio de Janeiro (Brasil). “O mundo cambiou, non queremos un emperador, somos países soberanos”, retrucoulle o líder brasileiro Lula da Silva. Sexa como for, os Brics constitúen o grupo de países cos aranceis máis altos impostos por Washington. Sobre os gravames a Brasília falou por teléfono Wang Yi, titular de Exteriores chinés, co seu homólogo brasileiro, Mauro Viera, ao que transmitiu que están dispostos a “reforzar o apoio mutuo” no contexto da disputa cos norteamericanos, na que as autoridades do Brasil están a valorar impor aranceis recíprocos. México e o Brasil sancionan acordos estratéxicos en enerxía ou comercio Tamén en América Latina múltiples estados seguen estreitando lazos para evitar os efectos das políticas estadounidenses. Na madrugada da sexta feira, o vicepresidente brasileiro, Geraldo Alckmin, rubricou co responsábel de Exteriores mexicano, Juan Ramón de la Fuente, unha serie de acordos estratéxicos que inclúen o comercio, mais que tamén abranguen áreas como enerxía, agricultura e saúde, nunha sinatura presidida pola presidenta mexicana, Claudia Sheinbaum. Cidade de México destacou que reflicten “a vontade de ambos os dous países por fortalecer a súa relación e a cooperación en ámbitos prioritarios, a partir da súa afinidade, a súa complementariedade e o seu compromiso co benestar dos seus pobos”. Antes, Alckmin firmara dous memorandos de entendemento co secretario de Saúde, David Kershenobich, que recoñecen con carácter recíproco as regulacións de cada Estado, o que permitirá acelerar a homologación de rexistros sanitarios ou facilitar investigacións clínicas, e que impulsarán a produción local de medicamentos estratéxicos, cun convenio para combater o dengue e a creación dun comité bilateral de saúde. En paralelo, fecháronse acordos para incrementar os investimentos bilaterais e desenvolver a industria dos biocombustíbeis, un campo no que México quere aproveitar a experiencia brasileira. A vaga de entendementos é en última instancia un éxito para o Brasil, que intentaba “contrarrestar os aranceis de Trump” ampliando a relación común, indicou a axencia EFE.