A ONU vincula a guerra civil en Libia co alto número de mortes nas inundacións

O alcalde da cidade mediterránea de Derna, no nordés de Libia, Abdulmenam al-Ghaithi, cifrou entre 18.000 e 20.000 o número estimado de mortes despois da ruptura de dous encoros, que liberou 33 millóns de litros de auga sobre a urbe de 125.000 habitantes, recolleron a quinta feira medios internacionais. As presas rebentaron a raíz das inundacións provocadas polo paso de Daniel, ciclón tropical que alcanzou a fin de semana territorio libio. Derna está encadrada, así como a meirande parte das zonas afectadas polas chuvias torrenciais, no territorio controlado polo Goberno do leste de Libia, con sede en Bengasi, enfrontado ao Executivo do oeste, que se localiza en Trípoli, o recoñecido pola Organización das Nacións Unidas (ONU), mais é Bengasi quen controla a maioría da produción de petróleo. Exipto, Rusia, Xordania e os Emiratos Árabes Unidos apoian o leste, e os Estados Unidos, a Unión Europea (UE) -agás Francia-, Turquía e Catar o oeste. Ao tempo, ambos os dous Executivos están sostidos por distintas milicias armadas con control territorial, incluídos grupos terroristas xihadistas. Esta situación, que se estende desde o comezo da guerra civil desatada polo ataque da Organización do Tratado do Atlántico Norte (OTAN) en 2011 para acabar co liderado de Muamar al Gaddafi, outorgou ás milicias un papel determinante na política libia, con cambios de bando e enfrontamentos constantes entre elas, como o que deixou 55 mortes en agosto en Trípoli polo control do aeroporto. A carencia de institucións, nun Estado que desde o asasinato de Gaddafi sufriu unha escalada dos niveis de pobreza, fame e “vulnerabilidade xeral”, afirma a ONU, chega até o punto de que é o único Estado que aínda non conta cunha estratexia climática, a pesar de que os fenómenos meteorolóxicos extremos están a gañar intensidade a medida que aumenta a temperatura global, cun especial impacto na contorna do Mediterráneo. Até o de agora as autoridades confirmaron 8.000 mortes, alén de máis de 10.000 persoas desaparecidas. A maioría destes falecementos “podería terse evitado” cun sistema de alertas que funcionase, co que as unidades de xestión de emerxencias poderían ter levado a cabo a evacuación da poboación, salientou a quinta feira Petteri Taalas, que encabeza a Organización Meteorolóxica Mundial, un organismo da ONU. O meteorólogo explicou que a guerra no país provocou que a rede de observación meteorolóxica ficara “moi destruída”, polo que “as inundacións chegaron e non houbo evacuación, pois non se contaba cos sistemas de alerta temperá axeitados”. De feito, a axencia AP afirma que “a cidade non tiña plans de evacuación”, de maneira que os residentes “non sabían que estaban en perigo até que escoitaron o son explosivo dos encoros ao rebentar”. Persoas superviventes relataron que un muro de auga cunha altura de varios andares chocou contra os edificios residenciais, afogando os habitantes en minutos. Equipos dos Emiratos Árabes Unidos, Exipto e Turquía están traballando no terreo, e outros países da rexión, así como a ONU, os EUA ou a UE xa enviaron axuda, así e todo, a asistencia está chegando lentamente a Derna, tanto polos danos ocasionados ás estradas como pola división política, pois “os esforzos internacionais para enviar equipos de rescate teñen que pasar polo Goberno con sede en Trípoli”, que con posterioridade precisa obter a autorización de Bengasi, detalla Claudia Gazzini, analista de Libia no International Crisis Group. "Corpos podrecendo" A cidade está marcada “polo cheiro e a calor dos corpos podrecendo”, esa é a “realidade baixo os edificios”, debulla o alcalde, que descarta atopar superviventes e reclama “equipos especializados na recuperación de cadáveres”, cando se multiplican os enterros en fosas comúns. Á vez, os traballos de salvamento tamén decorren noutras cidades afectadas como Al-Baida, na que Ossama Ali, voceiro dun centro de ambulancias, sinalou que a cuarta feira recuperaron no mínimo 150 corpos no mar. En paralelo, o risco de doenzas transmitidas pola auga e outro tipo de enfermidades é bastante alto, transmitiu Ahmed al-Mandhari, director na rexión da Organización Mundial da Saúde, á canle Sky News Arabia, e calculou que entre 1,5 e 1,8 millóns de persoas víronse afectadas polo desastre, arredor dunha cuarta parte da poboación libia. Asemade, o número de persoas desprazadas supera as 35.000, a meirande parte de Derna. A guerra civil tamén tivo un impacto directo no mantemento dos encoros que estouparon, pois co comezo do conflito a empresa turca contratada en 2007 para ese traballo marchou do país. No terreo, a dificultade de acceder á información está en alza. Fontes citadas pola canle Al Jazeera aseguran que “a medida que a devastación aumenta, o Exército Nacional Libio impide aos xornalistas entrar en Derna e confíscalles os seus teléfonos”. Esta milicia é o principal grupo armado do Executivo oriental.A veciñanza acusou a milicia de pedir á cidadanía que ficase nas súas casas e non evacuase poucas horas antes das inundacións. Con todo, outras fontes apuntan que se reclamou evacuar con mensaxes desde camionetas.