Novas mortes en Afganistán e Paquistán intensifican a guerra aberta en febreiro
A Policía da capital de Afganistán, a cidade de Cabul, denunciou esta sexta feira a morte de catro persoas, incluídas mulleres e nenos, nun bombardeo contra "vivendas civís" no leste da cidade, no que tamén resultaron feridas 15 persoas, un acto do que acusou a Paquistán, que segundo o Goberno talibán estaría tamén detrás doutros ataques contra Kandahar, no sur do país, Paktia e Paktika, no leste.
O portavoz do Goberno talibán, Zabihulá Muyahid, acusou Islamabad de "volver bombardear Cabul, Kandahar, Paktia, Paktika e algunhas outras zonas", no que describiu como unha continuación "dos seus ataques e crimes anteriores". "Nalgúns lugares atacou vivendas de civís, causando a morte de mulleres e crianzas", insistiu.
Á súa vez, un mínimo de sete policías morreron esta sexta feira nun atentado con bomba contra unha patrulla na localidade de Laki Maruat, situada na provincia de Jáiber Pastunjua, perto da fronteira con Afganistán.
O presidente paquistaní, Asif Alí Zardari, condenou firmemente o atentado e expresou as súas condolencias ás familias das vítimas, á vez que destacou a determinación "inamovíbel" do seu Goberno de Islamabad para lograr "eliminar o terrorismo".
A zona fronteiriza con Paquistán é desde hai anos un escenario inseguro, especialmente a causa dos ataques por parte do grupo Tehrik-i-Taliban Pakistan (TTP), no medio de acusacións contra India e Afganistán polo seu presunto apoio á organización, algo rexeitado desde Nova Deli e Cabul.
Estas tensións derivaron a finais do mes de febreiro nun novo conflito entre Paquistán e Afganistán tras unha serie de bombardeos por parte de Islamabad contra supostos obxectivos do TTP.
