Os progresistas buscan reducir a distancia cos conservadores nos últimos días da campaña lusa

A campaña electoral lusa de cara aos comicios parlamentarios do domingo entra na súa recta final. A terza feira, no décimo día dunha campaña que remata a sexta feira, os actos espalláronse por todo o país, coa conservadora AD, que integra o Partido Social Democrata (PSD) do primeiro ministro Luís Montenegro e o CDS-Partido Popular, encabezando as sondaxes. Montenegro acusou a terza o seu principal rival para lograr a reelección no cargo, Pedro Nuno Santos, secretario xeral do Partido Socialista (PS), de buscar gobernar con “base na desesperanza”, despois de advertir Santos da “inestabilidade económica e política que vivimos hoxe no mundo”, unhas circunstancias nas que, cos executivos conservadores, “quen sempre sofren son os cidadáns, os que traballan, os que se xubilan”. Horas máis tarde, e despois de que a denuncia constante do caso de Spinumviva non derivara nunha mudanza nas enquisas, que foron consolidando co paso das semanas o liderado de AD, Santos evitou responder a preguntas dos xornalistas sobre se continuará presionando para esclarecer o acontecido após as votacións, e ratificou que até ese día estará “concentrado” en “mobilizar o noso pobo” e “darlle esperanza”, ademais de loitar por que as súas condicións de vida melloren. O caso foi o detonante do adianto electoral, e refírese a unha empresa da familia do primeiro ministro que seguía cobrando de clientes logrados por el antes de chegar ao poder, clientes sobre os que tiña que tomar decisións para a extensión de concesións públicas, no que constituíu un conflito ético e de intereses. Ao achegarse a data límite, as formacións están a multiplicar os actos electorais, que no caso da AD os levaron a terza feira desde o distrito de Santarém, cunha visita a un arrozal e unha xuntanza con labregas e labregos antes dun mitin con cea no de Leiria. Entrementres, o PS centrou a xornada na área de Lisboa, a capital, con contactos coas e cos residentes, un xantar no cuartel de bombeiros de Queluz ou un mitin na Aula Magna da Cidade Universitária. Pola contra, a extrema dereita do Chega focalizouse no sur, no distrito de Faro, cunha ruada e unha cea de militantes co seu líder, André Ventura. En Setúbal, perto da capital, fixo unha visita a Lisnave, unha empresa de reparación naval, a comitiva da Iniciativa Liberal (IL), cuxo candidato, Rui Rocha, levou a cabo un acto de campaña máis tarde xa en Lisboa. Portugal celebra o 25 de Abril ás portas dunhas novas eleccións adiantadas Tamén en Setúbal, Mariana Mortágua, coordinadora nacional do Bloco de Esquerda (BE), estivo na Universidade Sénior, tras o que protagonizou un encontro na Faculdade de Ciências Sociais e Humanas da Universidade Nova de Lisboa antes de desprazarse a Braga a un mitin. En paralelo, a Coligação Democrática Unitária (CDU), a alianza do Partido Comunista (PCP) e Os Verdes, tamén comezou o día en contacto coa poboación da capital, concretamente na zona de Benfica, antes de que o seu candidato, o líder do PCP Paulo Raimundo, viaxara a un mitin en Coimbra. Non estivo en Lisboa Rui Tavares, do Livre, presente no distrito de Santarém, na praia fluvial de Constância, e logo en Aveiro, nunha acción electoral e nunha reunión coa administración do hospital, e si Inês de Sousa, voceira do Pessoas-Animais-Natureza (PAN), protestando contra as touradas. AD, primeira forza Até o feche de campaña as empresas demoscópicas poden continuar difundindo os seus traballos, e as últimas xornadas de campaña poden ser determinantes. Con todo, no último mes todas as enquisas coinciden en que a AD será a primeira forza e en que a Assembleia da República resultante será moi semellante á que vén de ser disolvida. A media das sondaxes do último mes de Rádio Renascença coloca os conservadores con 32,3% da intención de voto, seguidos polo PS con 26,6% e o Chega con 17,4%. Por detrás aparece IL (6,1%), Libre (3,9%), BE e CDU empatados con 2,8% e o PAN (1,3%). Na disputa pola primeira praza, AD e PS estaban hai un mes a menos de tres puntos, mais, de forma paulatina, os primeiros foron gañando apoios e os segundos perdéndoos. De feito, as dúas únicas compañías demoscópicas que sostiñan a comezos de abril que o PS sería primeira forza, Intercampus e Aximage, conclúen un mes despois que a AD vencerá con 4,7 e 0,2 puntos de vantaxe respectivamente. Nas eleccións lexislativas do 10 de marzo de 2024, tamén adiantadas após a dimisión de António Costa (PS) como primeiro ministro, a AD (daquela denominada Aliança Democrática e que tamén incluía o Partido Popular Monárquico, PPM) fíxose con 28,83% das papeletas, por 27,98% do PS, nas que, como no caso de Montenegro, eran as primeiras votacións de Santos como candidato. O pobo luso conmemora 51 anos da Revolución e 50 desde as primeiras eleccións libres A terceira praza foi para o Chega, logo da forte suba de votos á ultradereita, con 18,06%, e a cuarta para IL, que alcanzou 4,94%, seguida do BE, con 4,36%, a CDU, con 3,17%, o Livre, con 3,16%, e o PAN, con 1,95%. AD e IL, sen posibilidades de alcanzar a absoluta En base ás sondaxes, o estudo de probabilidades efectuado polo luso Público revela que AD e IL teñen 0% de opcións de lograr a maioría absoluta, igual que as posibilidades de que o PS se impoña e conte cunha maioría sumando BE, CDU e Livre. A súa compilación outorga 31,3% dos votos á AD, 26,7% ao PS, 18.1% ao Chega e 6,2% á IL, co Livre mantendo a quinta praza con 3,6%. Xa no caso da CDU, eleva os seus apoios a 3,4%, por 2,8% do BE e 1,6% do PAN. Onde as probabilidades son máis altas é no tocante a que AD e o Chega sumen a maioría absoluta, 85%, o que xa aconteceu hai un ano. Así e todo, e como daquela, Montenegro descartou un acordo de Goberno de calquera clase cos ultradereitistas. No que atinxe á IL, a AD apoiaría no seu seo tratar de integralo no Gabinete a pesar de non lograr a absoluta. Sexa como for, as enquisas tamén teñen un alto grao de diverxencia entre elas, con algunha prevendo unha vitoria da AD sobre o PS por até 8,8 puntos de distancia, como a de Pitagórica, e outras reducíndoa a catro puntos, como é o caso da de CESOP-Universidade Católica. Este último traballo constatou amais que 40% da poboación aínda non está segura de a quen votar, co PAN, Livre e IL como as forzas máis expostas aos cambios.