O primeiro ministro de Israel, Benjamin Netanyahu, prometeu que impedirá calquera tipo de influencia da Autoridade palestina sobe a Franxa de Gaza cando remate a operación militar contra o territorio palestino e contra a organización Hamás, xa que entende que ambas entidades están unidas no seu “compromiso para destruír o Estado de Israel”.
"Non vou cometer o erro de permitir que a Autoridade Palestina goberne en Gaza, sería o mesmo" que Hamás. Netanyahu avogou por "un cambio" no enclave palestino, que implique "a seguridade e o control de Israel".
Porén, a vicepresidenta dos Estados Unidos, Kamala Harris, avogou en Dubai por que "Gaza e Cisxordania [acaben] unificadas baixo a Autoridade Palestina" despois da guerra, un proxecto que choca frontalmente cos plans do seu aliado, que desbotou completamente esa posibilidade.
O portavoz do Consello de Seguridade Nacional dos EUA, John Kirby, insistiu en que "Gaza debe seguir sendo terra palestina e non pode ser reducida”, polo que o futuro político a medio prazo de Gaza aínda non está claro.
Pola súa parte, o Ministerio de Asuntos Exteriores da Autoridade Palestina respondeu ás palabras do Netanyahu acusando a Israel de dirixir os esforzos da operación militar contra Gaza a consolidar a separación total da Franxa e Cisxordania, evitando así a oportunidade de crear un Estado Palestino independente con capital Xerusalén Este”.
Continúan os bombardeos sobre Gaza
O exército israelí continuou este domingo bombardeando obxectivos en Gaza por terceiro día despois da ruptura da tregua a sexta feira. Aínda que non precisou o número de ataques, informou de que alcanzou "túneles, cuarteis [de Hamás] e almacéns de municións" e alertou de novos bombardeos contra a localidade de Khan Younis, no sur da Franxa, unha das máis afectadas desde o fin do cesamento do fogo.
As autoridades de Hamás en Gaza informaron de que máis de 700 palestinos morreron durante os bombardeos israelís nas últimas 24 horas no enclave palestino.
O Alto Comisionado das Nacións Unidas para os Dereitos Humanos, Volker Turk, advertiu este domingo de que "xa non hai un lugar seguro" en Gaza polos bombardeos israelís e reivindicou a necesidade de acometer algún tipo de investigación sobre posíbeis crimes de guerra durante o conflito aberto. desde o 7 de outubro entre Israel e Hamás para destacar unha vez máis a importancia do dereito internacional humanitario.
