Moscova responsabiliza a OTAN do ataque con drons contra Vladimir Putin

O Kremlin está a considerar “unha ampla variedade” de respostas, subliñou a quinta feira Dmitri Peskov, voceiro da Presidencia rusa, en referencia ao intento de asasinar o mandatario Vladimir Putin nun ataque con dous drons na madrugada da terza á cuarta feira. Os dispositivos foron abatidos sen provocar persoas feridas. Após acusar nun primeiro momento Ucraína do que consideran un atentado terrorista, a portavoz do Ministerio de Asuntos Exteriores ruso, Maria Zajarova, fixo fincapé en que “os que crearon e manexan o réxime de Kíiv, que proveñen de Washington, Londres e da Organización do Tratado do Atlántico Norte (OTAN), teñen a responsabilidade xeral de todo o que están a perpetrar” as autoridades ucraínas. Nese sentido, abundou en que os membros da alianza militar liderada polos Estados Unidos “eliminaron as autoridades lexítimas de Ucraína, colocaron oportunistas e bandidos ao mando, inxectáronlles diñeiro e armas, inculcáronlles un sentido de impunidade absoluta e proporcionáronlles cobertura política e apoio militar”. Arredor desa cuestión, Peskov detallou que é “indubidábel” o papel dos Estados Unidos no ataque, apuntando que “somos moi conscientes” de que “a determinación de obxectivos, a definición de recursos, todo isto se dita desde Washington”. Nun comunicado, o Ministerio criticou “o especial cinismo” das autoridades ucraínas, que define como “neonazis”, por efectuar o ataque pouco antes da celebración do Día da Vitoria contra o fascismo, que conmemora o 9 de maio a fin da Segunda Guerra Mundial. Os actos vinculados co Día da Vitoria foron prohibidos en Letonia e en parte de Estonia. Desde Washington, o portavoz do Consello de Seguridade Nacional estadounidense, John Kirby, asegurou que o país “non se involucrou nisto, fora o que fose, non nos involucrou”, e engadiu que non alentan ou permiten ataques ucraínos fóra das súas fronteiras. Á vez, indicou que están a investigar o incidente, tras defender o secretario de Estado Antony Blinken que non podía “validar” a información “de ningún modo”. En paralelo, o Reino Unido insinuou por medio dunha entrevista cun alto cargo anónimo de Defensa que Rusia podería estar detrás do ataque para ter “unha escusa para máis bombardeos aleatorios e imprudentes”. Tamén o presidente de Ucraína, Volodimir Zelenski, negou calquera responsabilidade no ataque, insistindo en que “loitamos no noso territorio”. Esta versión foi defendida como válida polo Alto representante para Política Exterior da Unión Europea, Josep Borrell, que pediu a Moscova que “non utilice este suposto ataque como escusa para continuar a escalada da guerra”. Pola súa parte, a voceira do Ministerio de Relacións Exteriores da China, Mao Ning, instou todas as partes a “evitar tomar calquera acción que poida agravar aínda máis a situación”, reiterando que a posición de neutralidade chinesa no conflito é clara, após propor un plan de paz. Contraofensiva O certo é que até os medios especializados occidentais como Ejércitos recoñecen que Ucraína atacou territorio ruso en múltiples ocasións desde o comezo da invasión, só nos últimos días foron rexistrados ataques contra unha base aérea na rexión de Briansk e mais unha serie de depósitos de combustíbel e unha refinaría na rexión de Krasnodar. Porén, non adoita confirmalo para non comprometer a súa situación. De feito, os Estados Unidos tiveron que vetar unha proposta de Kíiv de lanzar ataques en profundidade contra territorio ruso. Ao respecto, o Ministerio de Asuntos Exteriores ruso trasladou que “as actividades terroristas e de sabotaxe de Kíiv” están a “cobrar un impulso sen precedentes”, lembrando a “explosión na ponte de Crimea” e “os ataques contra obxectivos non militares nas rexións de Briansk, Belgorod e Rostov”. Este incremento responde a que a “contraofensiva [ucraína] comezou a nivel estratéxico con estas accións en profundidade sobre os postos de mando e os nodos loxísticos para frear o abastecemento do Exército ruso”, explica o xeneral Dominique Trinquand, ex xefe da misión militar de Francia na Organización das Nacións Unidas, que interpreta estes movementos como un intento de “crear un clima de nerviosismo entre os rusos”, reforzar a opinión pública ucraína tras os reiterados anuncios da contraofensiva e premer a OTAN para que envíe máis armamento, unha vez que Kíiv deixou entrever que a falta de material estaba detrás do atraso do ataque. Trinquand debulla que “os ucraínos están nunha posición de forza para obter unha vitoria nunha fronte pequena” ao enfrontarse a unha liña defensiva de 800 km construída nos últimos meses, e pon o foco en que “para Ucraína é un tiro dunha soa vez”, pois se non consegue superar rapidamente o Exército ruso “agárdannos varios meses de enfrontamento en primeira liña e a volta a unha guerra de desgaste”. Entrementres, o presidente Zelenski reclamou “unha mensaxe moi clara da OTAN” que lles garanta que unha vez rematada a guerra poderán adherirse á alianza militar, nunha visita á sede da Corte Penal Internacional na Haia, nos Países Baixos, onde solicitou a creación dun tribunal especial “para castigar os crimes da agresión rusa”. Beijing critica a apertura dunha oficina da OTAN no Xapón O Ministerio de Relacións Exteriores chinés recalcou onte que “a continua expansión cara ao leste da OTAN á rexión de Asia-Pacífico e a interferencia da alianza nos asuntos rexionais conducirá de forma inevitábel a socavar a paz e a estabilidade”, en resposta á publicación de Nikkei Asia que revelou que a OTAN programou en 2024 a apertura dunha oficina de enlace co Xapón para “realizar consultas periódicas” co país e “socios clave na rexión como Corea do Sur, Australia e Nova Zelandia”. Beijing salientou que o avance da OTAN, paralelo ao incremento da presenza diplomática estadounidense na rexión e despois do acordo de Washington con Australia e Corea do Sur para enviar submarinos de propulsión nuclear e con armas atómicas respectivamente, “facilitará a confrontación entre bloques”, o que “debería preocupar particularmente a rexión”. A China acusa a CIA Un informe do Centro Nacional Chinés de Resposta a Emerxencias perante Virus Informáticos implicou a Axencia Central de Intelixencia (CIA) estadounidense en ciberataques na última década, lanzando amais campañas de desinformación para fomentar a caída de Gobernos que catalogou como contrarios aos intereses estadounidenses, como nas "revolucións de cores".