Modi arríscase a unir a oposición india tras o arresto de dous líderes territoriais

As mobilizacións desatáronse a sexta feira en Delhi, o territorio no que se localiza a capital india, Nova Delhi, onde se produciron enfrontamentos entre a Policía e partidarios e altos cargos do Partido do Pobo Común (AAP). Horas antes, o primeiro ministro de Delhi por parte da formación, Arvind Kejriwal, que tamén é na última década un dos políticos máis importantes do país, foi arrestado por un organismo federal controlado polo Executivo de Narendra Modi (Partido Popular, BJP), que o acusou de aceptar 11 millóns de euros en subornos por parte de empresas relacionadas coa venda de licores, algo que o AAP nega, incidindo en que se trata dun invento, e ratificou que Kejriwal seguirá a gobernar desde a prisión. En xaneiro, o detido foi Hemant Soren, tamén acusado de corrupción e que acababa de dimitir como primeiro ministro do Estado de Jharkhand. A súa formación, a Fronte de Liberación de Jharkhand, forma parte como o AAP da Alianza Inclusiva para o Desenvolvemento Nacional da India (INDIA), que suma unha corentena de organizacións lideradas polo progresista Congreso Nacional para enfrontar nas eleccións xerais Modi, que encabeza a conservadora Alianza Democrática Nacional e o BJP, que ten nestes momentos por si mesmo a maioría absoluta da Cámara Baixa, o Lok Sabha. Modi aspira a facerse cun terceiro mandato como primeiro ministro indio. Rahul Gandhi, candidato do Congreso, reaccionou ao arresto de Kejriwal sostendo que “un ditador asustado quere crear unha democracia morta”, e un dos principais colaboradores do primeiro ministro de Delhi, Saurabh Bharadwaj, que se desempeña como ministro de Saúde territorial, afirmou que Modi pode facer “o que sexa que lle apeteza”, pois “até o de agora arrestaron dous primeiros ministros, e é posíbel que poidan arrestar máis”, acusándoo de reprimir para “gañar as eleccións”. Pouco antes da detención, o Congreso convocara unha rolda de prensa para denunciar que as súas contas bancarias estaban conxeladas, o que lles impide organizar a campaña electoral, e que Gandhi considerou unha “acción criminal” efectuada “polo primeiro ministro e polo ministro do Interior”, nun litixio polo atraso na declaración de impostos da formación hai un lustro. A principal forza opositora india denuncia o bloqueo das súas contas O BJP rexeita todas estas acusacións, mais a xornalista e analista Neerja Chowdhury explica que “semella acoso, posto que só se sinala aos líderes da oposición”, resolvendo que “non hai igualdade de condicións”. O certo é que desde que en 2014 Modi se converteu en primeiro ministro, un 95% dos casos asumidos pola principal axencia de investigación da India e pola que arrestou Kejriwal foron dirixidos contra membros da oposición, indica a canle Al Jazeera. Outro analista, Asim Ali, detalla que “o risco para o BJP é converter Kejriwal nun mártir”, presentando Modi como autoritario e arrogante e impulsando os votos pola oposición, que loitaba para manter unida a INDIA. As enquisas publicadas este mes apuntan que a alianza conservadora manterá a maioría absoluta con comodidade nos comicios á Cámara Baixa que comezan o 19 de abril e que se estenderán até xuño. A pesar diso, sondaxes como a da canle ABP News deixan INDIA a apenas sete puntos de distancia, 46% contra 39% en intención de voto. O Goberno conservador estivo marcado polo avance na implementación da hindutva (hinduidade), un nacionalismo relixioso que, amais de outorgar preeminencia ás persoas que teñen estas crenzas, se relaciona coa intención do BJP de “baleirar a Constitución dos valores progresistas mínimos que contén”, indica o sindicalista Sushovan Dhar. Ao tempo, Modi reverteu a arquitectura federal do país e “invadiu repetidamente competencias dos Estados”, chegando a acabar coa autonomía de Caxemira, ademais de adoptar normas para “compracer as empresas”, como as que provocaron masivas manifestacións agrarias. Á vez, subliña que entre os “fallos” da Carta Magna está o sistema electoral baseado en distritos electorais uninominais, copiado do Reino Unido, pois primeiro permitiu que o Congreso se mantivera no poder a pesar da caída dos apoios populares e agora outorga a Modi unha presenza “desproporcionada” no lexislativo. Pola súa parte, Gandhi, que foi inhabilitado brevemente en 2023 tras unha denuncia do BJP, fai énfase na aposta da INDIA pola xustiza social, defendendo a fin das políticas vinculadas coa hindutva e a secularización do país. A Corte Suprema da India avala a fin da autonomía de Caxemira A política exterior, fóra do debate electoral O que non forma parte do contexto electoral é o debate arredor da política exterior de Modi, que malia rachar o consenso histórico indio apoiando Israel na agresión militar contra Gaza en detrimento de Palestina, mantén a autonomía estratéxica india, así como as relacións con Rusia, e tanto Gandhi como Modi advirten do avance na capacidade de influencia rexional da China, coa que a India comparte fronteira. “Temos unha relación con Rusia” e “certa dependencia deles”, co cal “tería unha postura moi similar á do Goberno” posto que “tamén temos que velar polo noso interese nacional”, indicou Gandhi ao ser cuestionado sobre a guerra en Ucraína. Precisamente no marco do avance da China, que está a gañar o favor de actores que tradicionalmente estaban moito máis achegados a Nova Delhi, como o Nepal ou as Maldivas, e negocia con outro, Bután, a delimitación da fronteira común, intensificouse a proximidade entre a India e os Estados Unidos, que chegaran a negar o visado a Modi no pasado pola súa participación nas revoltas relixiosas de 2002 nas que foi masacrada a comunidade musulmá de Gujarat. O aliñamento da India Sen implicar que a India vaia aceptar ingresar nunha alianza excluínte con outros Estados da man de Washington, os membros da Organización do Tratado do Atlántico Norte (OTAN) están a apoiar o país como un contrapeso da China na área. O líder da alianza militar, os Estados Unidos, recoñeceron esta semana como territorio indio unha área en disputa coa China, o que foi cuestionado por Beijing como un intento de usar o conflito para os “intereses egoístas” estadounidenses. Nova Delhi tamén participa no Quad, un grupo informal para contrarrestar a influencia chinesa no que tamén están os Estados Unidos, Australia e o Xapón, e, en paralelo, é membro do grupo Brics, do que tamén fai parte a China. A India desconfía da Franxa e a Ruta A iniciativa chinesa da Franxa e a Ruta, que busca impulsar unha versión moderna da Ruta da Seda por medio da cooperación internacional, foi criticada en distintas ocasións polas autoridades indias, que aseguran que ignora as preocupacións arredor da súa soberanía e integridade territorial polo corredor económico sino-paquistaní, que une a China co porto de Gwadar, no mar Arábigo, evitando así o estreito de Malaca e facilitando as exportacións a Europa.