Mercosur culpa a UE de frear un potencial tratado comercial coas súas imposicións

Esta terza feira decorreron dúas cimeiras a nivel internacional co punto de vista nas estratexias futuras de dous bloques de Estados a nivel económico e comercial. O acordo comercial entre Mercosur e a UE fica no ar a raíz das tensións entre o Brasil e Francia Por unha parte, os líderes dos Estados que pertencen á Organización da Cooperación de Shanghai (OCS) -A China, a India, Rusia, Irán, Paquistán, Casaquistán, Kirguizistán, Taxiquistán e Uzbequistán-, que superan amplamente en conxunto os 3.000 millóns de habitantes, mantiveron un cumio en liña. Por outro lado, os mandatarios dos Estados do bloque de Mercosur -O Brasil, a Arxentina, o Uruguai e Paraguai-, que supoñen máis de 270 millóns de habitantes, tamén mantiveron unha reunión esta terza feira, na que, entre outras cuestións, abordaron a posibilidade de asinar un tratado comercial coa Unión Europea (UE), que á súa vez supón un bloque de case 450 millóns de habitantes. O líder arxentino, Alberto Fernández, até esta terza feira á fronte de Mercosur, responsabilizou a UE pola "falta de consenso" para concretar a sinatura do acordo con Mercosur. Fernández dixo que a UE adoece de "vocación de traballo", o que foi contraproducente para chegar a un pacto beneficioso para ambos os bloques. "As dificultades para avanzar foron produto da falta de consenso ou vocación de traballo por parte dos Estados da UE, non por parte dos membros de Mercosur. Pola contra, alí, na UE, están as actitudes proteccionistas, particularmente notorias no caso do sector alimentos, aspecto fundamental na oferta exportadora do noso bloque", explicou o presidente arxentino. Fernández advertiu que na actualidade o mundo enfronta unha serie de desigualdades "que se profundan" e que se suman á aguda crise que sofre o proceso de globalización que está "a mudar", onde "os grandes capitais xa non buscan baixar custos senón evitar riscos xeopolíticos e de abastecemento en xeral". Por isto, instou os Estados da rexión a unirse e deixar fóra todo tipo de división. "Sexamos fortes defendendo os nosos intereses, sexamos artífices do noso futuro, divididos só seremos escravos", afirmou. Os Estados de Mercosur reuníronse en Porto Iguazú, na provincia de Misións, na Arxentina, cunha axenda centrada no acordo coa UE, que a pesar de ser asinado en 2019, aínda non foi implementado. A rúbrica do pacto quedou no aire polas condicións que a UE quere impor aos Estados de Mercosur. Na cimeira desta terza feira, o mandatario do Brasil, Luiz Inácio Lula da Silva, recibiu o liderado de Mercosur. Ao respecto, deixou claro que a sinatura do pacto coa UE está entre as súas prioridades: "Comprométome a concluír o acordo coa UE, que debe ser equilibrado e asegurar o espazo necesario para adoptar de políticas públicas a favor da integración produtiva e a reindustrialización", expresou Lula. Porén, sobre a negociación coa UE, que xa leva máis de dúas décadas, insistiu en que non hai ningún interese en acordos que condenen a Mercosur "ao eterno papel de exportadores de materias primas, minerais e petróleo". O mandatario brasileiro queixouse do "instrumento adicional" presentado pola UE no primeiro trimestre deste ano, ao que cualificou de "inaceptábel". Lula explicou que se trata dun engadido ao capítulo de comercio de bens, que se centra en cuestións ambientais, que irían máis aló do acordado en foros multilaterais e que se traducen en exixencias que poderían implicar sancións. "Os socios estratéxicos non negocian baseados na desconfianza e a ameaza de sancións, é por tanto imperativo que o Mercosur presente unha resposta rápida e contundente", salientou o presidente do Brasil. Bolivia avoga por reducir a dependencia do dólar O presidente de Bolivia (Estado que se atopa en proceso de adhesión a Mercosur), Luís Arce, apelou os Estados de Mercosur a "reducir a dependencia do dólar" como mecanismo de supervivencia nunha "crise estrutural do capitalismo". "O pobo boliviano ten unha vocación integradora. Consideramos que a adhesión de Bolivia a Mercosur representa unha oportunidade única para fortalecer a integración, ampliar o comercio e a cooperación rexional", dixo Arce. Bolivia defendeu a realización de transaccións con moedas propias Nese sentido, reiterou o seu chamado a unha maior integración e cooperación rexional para "reducir a dependencia do dólar estadounidense" e desa forma "diversificar as nosas relacións económicas e comerciais". "O Mercosur ten as fronteiras máis extensas de América Latina, debemos articular os nosos esforzos na fronteira para promover o comercio", afirmou. Entre as súas propostas, o boliviano avogou por "buscar alianzas estratéxicas con outros actores internacionais, como a China, que ofrecen alternativas ao dólar no comercio e nos investimentos". Empate catastrófico e poder dual en Bolivia De feito, resaltou a valía doutros organismos, como os BRICS, "que se proxectan como espazos de construción dunha nova orde económica mundial". Ademais, Arce chamou a promover o uso das moedas locais a nivel rexional nas transaccións internacionais para que se efectúe de maneira directa entre os Estados da zona. "Non hai soberanía política plena se non logramos unha independencia económica", subliñou Arce. O presidente boliviano referiuse tamén á importancia dos Estados suramericanas como reservas de recursos (Bolivia posúe unha das maiores reservas de litio). "Temos moitos recursos que espertan cobiza de quen sempre se levaron todo sen deixarnos nada", argumentou. O bloque de Shanghai rexeita a imposición de sancións unilaterais O presidente da China, Xi Jinping, propuxo esta terza feira na cimeira da Organización de Cooperación de Shanghai (OCS) que os Estados do bloque -A China, a India, Rusia, Irán, Paquistán, Casaquistán, Kirguizistán, Taxiquistán e Uzbequistán- aumenten os seus pagamentos nas moedas estatais. "Considero oportuno aumentar a porcentaxe de pagamentos en moedas estatais dentro da organización", declarou o mandatario asiático. A China instou os seus socios a cooperar na Nova Ruta da Seda Por outra parte, Xi asegurou que "a paz e o desenvolvemento non se poden deter", e pediu aos Estados membros máis "esforzos" para cooperar dentro do macroproxecto internacional chinés de infraestruturas coñecido como a Nova Ruta da Seda. O grupo dos BRICS busca seguir medrando: Bangladesh, a seguinte incorporación? Así mesmo, Xi instou os Estados da organización a contrarrestar as sancións económicas unilaterais e a rexeitar "o proteccionismo". O mandatario tamén lanzou un chamamento a favor de "cooperar en lugar de competir". "A China está disposta a colaborar con outros Estados para lograr a seguridade mundial", engadiu o mandatario. O presidente da India, Narendra Modi, destacou o respecto á soberanía como o piar clave da rexión durante os seus comentarios de apertura na cimeira. "Non vemos á OCS como unha veciñanza extensa, senón como unha familia estendida", resaltou Modi. Pola súa parte, o mandatario ruso, Vladimir Putin, tamén rexeitou as sancións unilaterais. "Agora contra nós lévase a cabo, de feito, unha guerra híbrida, empréganse sancións antirrusas, ilexítimas e sen precedentes pola súa magnitude", sinalou o líder do Kremlin.