Leonor de Borbón xura a Constitución española entre o rexeitamento das forzas nacionalistas, que ignoraron o acto

As e os representantes do Bloque Nacionalista Galego (BNG), Esquerra Republicana de Catalunya (ERC), Junts, EH Bildu e o Partido Nacionalista Vasco (PNV), as forzas soberanistas con representación no lexislativo do Estado español, canda o presidente catalán, Pere Aragonès, e o vasco, Iñigo Urkullu (PNV), negáronse hoxe a asistir á xura da Constitución por parte de Leonor de Borbón, princesa de Asturies e herdeira da monarquía española, coincidindo co seu 18 aniversario. A cerimonia é un dos requisitos para poder acceder ao posto de carácter hereditario que agora ocupa o seu pai, o rei español Felipe VI. Nun comunicado conxunto, BNG, ERC e EH Bildu cualificárona dunha “monarquía herdeira da ditadura [de extrema dereita encabezada por Francisco Franco] e peza fundamental do réxime” que bloquea “as aspiracións nacionais e sociais” da Galiza, Catalunya e Euskadi, onde “millóns de persoas” nin “recoñecen nin amparan” este réxime, que non as representa, inciden, apuntando que o mesmo acontece “no resto de pobos do Estado español”. Explicando o porqué da súa ausencia, subliñan que “non participaremos do enésimo intento de perpetuar unha institución arcaica, opaca, que amparou sistematicamente a corrupción e que resulta contraria aos intereses populares”. Nese sentido, reiteran que a monarquía española e os seus membros conforman tanto “un dos máximos expoñentes da negación dos dereitos civís, políticos e nacionais” dos pobos galego, catalán e vasco, como da “desigualdade, os privilexios e a impunidade fronte ao resto de cidadáns e cidadás”. Asemade, e baseándose na carencia de lexitimidade do rei e as herdeiras nestes países, recalcan que “non lles recoñecemos ningunha función política nin institucional”, asegurando que “a imposición e a negación” foron a súa principal postura no que atinxe á Galiza, Catalunya e Euskadi, facendo fincapé en que este aspecto fíxose aínda máis evidente polo discurso de Felipe VI o 3 de outubro de 2017, no que arremeteu “contra a cidadanía catalá e o seu exercicio de decisión democrática”, en alusión ao referendo de independencia que decorrera dous días antes, e logo do que se intensificou a represión do Estado contra as persoas independentistas e membros do Goberno catalán, que se dividiron entre os cárceres españois ou o exilio. Exceptuando as forzas nacionalistas e unha parte das e dos representantes de Sumar, que enviou unha delegación coa líder da formación, a vicepresidenta segunda e ministra de Traballo e Economía Social, Yolanda Díaz, e a voceira parlamentaria Marta Lois á cabeza, o resto de grupos con presenza no Congreso e no Senado español estiveron presentes no evento, no que declinaron participar as dúas ministras de Podemos e o de Esquerda Unida, partidos integrados en Sumar. O que si acudiu foi o presidente galego, Alfonso Rueda, do Partido Popular (PP). Tras a xura da Carta Magna española no lexislativo, comezou un acto conmemorativo no Palacio Real, en Madrid, no que Leonor reclamou ás persoas do Estado español que “confíen en min, como eu teño posta toda a miña confianza no noso futuro”. Durante a súa intervención, Felipe VI destacou a “expresión de compromiso de quen encarna a continuidade da nosa monarquía”, ao tempo que Pedro Sánchez, presidente español en funcións (PSOE), proclamou que deu “máis futuro á promesa sobre a que se funda a nosa convivencia” e trasladou a “lealdade, o respecto e o afecto do Goberno”. "Boicot" soberanista O presidente do PP, Alberto Núñez Feixoo, tamén fixo énfase na “continuidade” da monarquía e criticou o “boicot” de membros do Consello de Ministras e Ministros e das forzas nacionalistas, o que considerou como “outra anomalía democrática” ao tratarse de formacións das que depende Sánchez para continuar á fronte do Goberno. Pola súa parte, Santiago Abascal, que dirixe a ultraespañolista Vox, cuestionou que poucas horas antes da xura o secretario de Organización do PSOE, Santos Cerdán, se reunira co ex presidente catalán Carles Puigdemont (Junts) en Bruxelas (Bélxica), lugar no que se exiliou perante a persecución do Estado, para abordar a amnistía ás e aos independentistas cataláns represaliados, unha das exixencias das forzas catalás para apoiar a investidura de Sánchez. Despois da fin da reunión semanal do Goberno de Catalunya, a súa voceira, Patrícia Plaja, salientou que fala en nome dun Gabinete “catalán, republicano e independentista” e censurou un “acto que intenta branquear e perpetuar a monarquía”, unha institución “anacrónica”. No tocante a Euskadi, non houbo declaracións oficiais do portavoz do Executivo liderado polo PNV, Bingen Zupiria, que está nunha viaxe oficial, namentres o lehendakari Urkullu xuntouse na sede gobernamental de Gasteiz coa Fundación Artizarra. En paralelo ao comezo da xura, difundiuse o manifesto Felipe VI: 10 anos chegan, asinado por máis de 250 persoas procedentes de partidos progresistas españois, da cultura ou o activismo, que fan un chamamento a mobilizarse en xuño de 2024 a favor de que o Reino de España se converta nunha república. A Casa Real española, investigada por corrupción Malia que o rei emérito español, Juan Carlos I, superou todas as investigacións por corrupción na súa contra, o emérito aínda está a residir nos Emiratos Árabes Unidos, país ao que fuxiu en 2020 no marco das pescudas, as mesmas que o levaron a abdicar en 2014 en favor do seu fillo e pai de Leonor, o actual monarca Felipe VI. Ao respecto das investigacións no Estado español, ao que pagou case cinco millóns de euros por non declarar as súas ganancias ao longo de varios exercicios, a Fiscalía fechou o caso en 2022 admitindo irregularidades mais escudándose en que non podía ser perseguido penalmente por delitos cometidos cando exercía como xefe de Estado. Xa no Reino Unido, un tribunal desbotou hai poucas semanas a demanda por acoso da súa ex amante Corinna Larsen, ao decretar que a denuncia tiña que ser presentada no país onde reside. Larsen explicou que o acoso se debeu a súa negativa a devolver ao emérito os 65 millóns de euros que puxo ao seu nome tras recibilos de Riad, presuntamente como suborno por un contrato de infraestruturas. Este pago tamén foi investigado pola Xustiza suíza, que fechou o caso a finais de 2021 ao non atopar probas suficientes para xulgalo por “branqueo de diñeiro agravado”. Aínda que Felipe VI sostivo que renunciará á herdanza paterna para tratar de desvincularse da corrupción, os datos feitos públicos en 2022 revelan que conta cun patrimonio de dous millóns e medio de euros, a meirande parte en depósitos na súa conta corrente ou en fondos de investimento.