Ucraína trata de conservar Bakhmut ante o avance ruso

A posición das tropas ucraínas en Bakhmut, a cidade de Donetsk que se converteu nos últimos meses no epicentro dos combates da guerra en Ucraína, é “extremadamente tensa”, asumiu a terza feira Oleksandr Syrskyi, comandante das Forzas Terrestres de Ucraína, explicando que “as unidades de asalto máis preparadas de [a empresa de mercenarios] Wagner están tentando romper as defensas das nosas tropas e rodear a cidade”. A localidade -que tiña 70.000 habitantes antes da chegada das hostilidades- está practicamente cercada polo Exército ruso despois da toma da maioría das vilas que a rodean nas últimas semanas, e segundo os documentos audiovisuais feitos públicos, arrasada polos enfrontamentos que levaron a evacuar os civís que aínda ficaban nas súas casas. O analista militar ucraíno Oleh Zhdanov explicou que a “parte sur de Bakhmut é a única zona que pode describirse como baixo control ucraíno, no resto de distritos a situación non se pode predicir, é imposíbel dicir onde se atopa a liña da fronte”. Aínda que non hai cifras fiábeis do número de baixas militares, Troy Offenbecker, un ex soldado estadounidense que se desempeña como mercenario para as tropas ucraínas, revelou a ABC News que a “esperanza de vida é dunhas catro horas na primeira liña”, nunha batalla que definiu como “unha picadora de carne”. Medios especializados informaron de que nestes momentos apenas unha vía de subministración ás tropas ucraínas na urbe permanece aberta, ademais, dan por descartada a contraofensiva anunciada por Kíiv para recuperar o control das localidades da contorna. En todo caso, isto non quere dicir que ao longo da liña da fronte non se estean a producir combates, como acontece perto de Avdivka, Marinka ou Vuhledar. Sen data para o asalto á cidade Malia que as tropas de Moscova están perto de facerse con Bakhmut, fontes rusas sosteñen que o asalto non se producirá até asegurar as súas posicións na zona, mentres que un xornalista de Reuters que estivo na cidade a segunda feira declarou que non había signos de retirada ucraína, destacando que continuaban a chegar reforzos. Sexa como for, Al Jazeera comunicou que as forzas rusas están premendo ao norte, sur e leste do municipio. Asemade, tamén subliñou a importancia a nivel militar do seu control, o que explica o interese tanto de Kíiv como de Moscova nela, pois unha vitoria rusa “facilitaría que o Exército de Rusia chegue a Sloviansk e Kramatorsk”, forzando o retroceso ucraíno varias ducias de quilómetros. Estas dúas cidades son os únicos grandes centros urbanos de Donetsk que controla Kíiv. Ao tempo, a toma de Bakhmut tamén racharía a ruta de abastecemento militar ucraína na zona, o que xerou que Eduard Moskaliov, líder militar de Ucraína no Donbás, fora substituído para tratar de conservar a urbe. A pesar de que non houbo confirmación rusa do comezo dunha ofensiva anunciada pola prensa occidental, distintos medios fan fincapé no efecto do desxeo nas hostilidades en Ucraína nas vindeiras semanas, sobre todo no marco dun conflito de desgaste con gran presenza de trincheiras. A este respecto, hai consenso en que os próximos meses marcarán o devir do conflito, pois Bild, citando fontes oficiais, apuntou que os Estados Unidos e a Unión Europea planean forzar Kíiv a aceptar negociacións de paz se fracasa a súa contraofensiva antes do outono. Desde a invasión rusa os países da Organización do Tratado do Atlántico Norte (OTAN), prometeron a Kíiv case 140.000 millóns de euros de asistencia, arredor de 62.000 só en armamento. Do lado de Moscova, e aparte de exixencias como que Kíiv renuncie a entrar na OTAN, os obxectivos territoriais fixados polo Kremlin comprenden as catro rexións incorporadas a Rusia en 2022 por medio de referendos non recoñecidos pola Organización das Nacións Unidas, Donetsk, Luhansk, Zaporijia e Khersón. Con case 100% de Luhansk en mans rusas, desde a invasión os principais avances dos seus militares producíronse en Zaporijia e Khersón, mais en Donetsk foron moi reducidos, ao estar situado na contorna da capital homónima boa parte do esforzo bélico de Ucraína desde o comezo da guerra no país en 2014. Nese sentido, o voceiro do Executivo ruso, Dmitri Peskov, insistiu en que están abertos ás negociacións mais Kíiv debe aceptar as novas “realidades territoriais”, recolle Tass, en paralelo, as autoridades ucraínas trasladan de forma pública que confían en recuperar todo o territorio, incluída Crimea, incorporada a Moscova en 2014. Aínda que a nivel público os países da OTAN ratifican as aspiracións ucraínas, “en privado as conversas son moito máis escuras” e non agardan que iso suceda, aseverou Stephen Walt, profesor de Relacións Internacionais da Universidade de Harvard, a Foreign Policy. Arredor das solicitudes de armas de Kíiv -onte mesmo o presidente Volodimir Zelenski reiterou que precisan avións de combate-, Walt advirte que “os pedidos cada vez máis vehementes [...] poden reflectir a consciencia de que Ucraína está nunha peor posición da que informan os medios”. Bombardeos Amais, Kíiv informou de que ataques rusos na rexión de Khersón provocaron cando menos catro mortes ao afectar varias vivendas, pola súa parte, Moscova fixo público o derribo de varios drons ucraínos que estaban dirixidos a infraestruturas civís rusas, un deles a pouco máis de 100 km da capital rusa. Máis de 11.000 civís morreron en Ucraína desde o comezo da guerra en 2014, a meirande parte en Donetsk, sen que polo de agora haxa indicios no curto prazo da posibilidade de conversas de paz. O plan chinés foi apoiado de forma pública por Irán e Hungría, e o Brasil instou a que o grupo Brics negocie a fin das hostilidades. Kíiv, na OTAN mais no "longo prazo" O secretario xeral da OTAN, Jens Stoltenberg, asegurou que Ucraína se converterá nun membro da alianza militar liderada polos Estados Unidos pero ao “longo prazo”, xa no curto, trata de que Turquía acepte os países nórdicos no grupo antes das eleccións de maio en Ancara. Ao tempo, Rusia defendeu que a OTAN está "de facto" en guerra contra o país, e acusou Washington de preparar un ataque con armas químicas contra as súas tropas en Ucraína, tras constatar o envío de substancias tóxicas a unha fábrica de aceiro de Kramatorsk, en Donetsk.