Israel atrasa a reforma da Xustiza para evitar unha "guerra civil"

O primeiro ministro israelí, Benjamin Netanyahu, anunciou na tarde da segunda feira unha suspensión temporal da proposta do seu Goberno de reformar a Xustiza do país facendo alusión ao risco de “guerra civil” e acusando “unha minoría extremista” das protestas. Aínda que reclamou diálogo para avanzar nas mudanzas, ratificou que a reforma acabará sendo aprobada. De promulgarse a batería lexislativa a Xustiza israelí quedaría sometida á Knesset (Asemblea) controlada polos conservadores, que podería nomear os xuíces do Tribunal Supremo e impedir que os maxistrados veten a entrada en vigor de leis que declaren como inconstitucionais, unha potestade que pasará a ser unha recomendación ao lexislativo. O anuncio chegou no marco dunha folga lanzada pola Unión Xeral de Traballadores de Israel no caso de que Netanyahu non paralizase a reforma, e que secundaron rapidamente autoridades municipais, centros de saúde, o sector de alta tecnoloxía, os centros comerciais ou os traballadores do aeroporto internacional Ben Gurion, que se uniron ás 100.000 persoas que protestaban contra a reforma diante do lexislativo en Xerusalén. Aínda que ás 10 da mañá estaba convocada unha rolda de prensa por parte de Netanyahu, segundo os medios israelís para anunciar a suspensión temporal da mudanza, a mensaxe do primeiro ministro non se produciu até 10 horas máis tarde, o que a prensa atribuíu á manifestación a favor da reforma da tarde e ao intento do mandatario por avaliar as forzas coas que conta. Yulia Malinovsky, deputada de Nosa Casa é Israel, unha formación de oposición, fixo fincapé en que “o enfrontamento entre opositores e partidarios podería rematar con imaxes moi difíciles”, e acusou a Netanyahu de “estar xogando con vidas humanas”. “Cada minuto no que atrasa o seu anuncio as temperaturas van subindo”, resolveu. Nesta situación, o ministro de Finanzas, Bezalel Smotrich, da forza de extrema dereita Partido Sionista Relixioso, insistiu en que “non debemos deter a reforma” e “entregarnos á violencia, á anarquía, ás negativas ao servizo militar e ás folgas salvaxes”, e fixo un chamamento a participar na manifestación a favor da mudanza legal. Precisamente as formacións de extrema dereita e ultra ortodoxas integradas na coalición que permitiu a Netanyahu volver ao poder foron as que lle fixeron maior presión para aprobar a calquera custo a reforma, baixo ameaza de acabar coa maioría no lexislativo que lle permite gobernar e forzar a convocatoria de novas eleccións. Ao longo do día Netanyahu reuniuse co seu Executivo para tratar de alcanzar un consenso ao respecto, porén, tivo que efectuar novas cesións á extrema dereita para manter o Gabinete, recoñeceu Itamar Ben Gvir, ministro de Seguridade Nacional e líder de Poder Xudeu, unha destas forzas. Ben Gvir, que adiantara que dimitiría no caso de atraso na aprobación do paquete lexislativo, sostivo polo tarde que aceptou adiar o debate até maio a cambio de que o próximo Consello de Ministros aprobe a creación dunha garda nacional civil, que estaría ao cargo do ministro de extrema dereita. A medida foi criticada polo ex xefe da Policía israelí, Moshe Karadi, que afirmou que quere “formar unha milicia privada para as súas necesidades políticas”. Destitución de Gallant Após semanas de protestas, nas que as marchas e accións como os cortes de estrada se intensificaron nas últimas xornadas, con negativas de reservistas do Exército a acudir aos seus postos e até a admisión por parte da fiscal xeral de Israel, Gali Baharav-Miara, de que a proposta é ilegal, as tensións acadaron un novo pico coa destitución o domingo do ministro de Defensa Yoav Gallant, un día despois de que reclamara suspender a reforma “polo ben do Estado e dos nosos fillos”, que desencadeou na madrugada protestas masivas nas que se estima participaron 650.000 persoas. Os medios locais defenderon que Netanyahu ofreceu ao ex titular de Defensa do seu mesmo partido, o Likud, volver ao posto mais renunciando ao seu escano como deputado, para intentar conservar a maioría no órgano perante unha potencial rebelión nos asentos que sosteñen o Executivo, unha posibilidade rexeitada por Gallant. O xefe do Estado Maior das Forzas Armadas, Herzi Halevi, fíxose eco da advertencia sobre os riscos para a seguridade estatal difundidos por Gallant e salientou que Tel Aviv “nunca coñeceu días de ameazas externas combinadas cunha tormenta interna”, solicitando “responsabilidade” á Administración. Malia que as protestas en Israel proclaman a súa defensa da democracia nun Estado que se define como xudeu, non teñen nada que ver coa ocupación israelí de Palestina ou co apartheid que sofre. “A poucos metros das protestas milleiros de palestinos viven baixo a ditadura”, explicou a analista de política internacional Rula Jebreal, que asegurou que “deter a lexislación sen desmantelar a ocupación erosiona a democracia e dá valor ás forzas tiránicas en Israel”, ironizando con que “o espertar de Israel ao autoritarismo é benvido e hai moito tempo”. De feito, as protestas non frearon as incursións israelís en Palestina e a represión continua, como amosou a entrada durante a fin de semana da Policía e de colonos israelís no recinto da Mesquita de Al Aqsa durante unha época de especial importancia para os musulmáns, o Ramadán. 87 palestinos asasinados en 2023 Tampouco diminuíron os asasinatos ou os ataques de colonos protexidos polos militares de Israel contra palestinos e as súas propiedades. Desde o comezo de 2023 87 palestinas e palestinos morreron a mans das tropas israelís, forzas de seguridade e colonos. Os EUA, preocupados pola reforma O Executivo dos Estados Unidos que preside Joe Biden trasladou a súa “profunda preocupación polos acontecementos”, e instou a chegar “a un acordo o antes posíbel”. Aínda que Washington é o principal aliado de Israel, as tensións floreceron nas últimas semanas, o que levou o primeiro ministro israelí a prohibir aos seus ministros viaxar aos Estados Unidos até recibir un convite de Biden. Amais, medios internacionais filtraron onte que Netanyahu confirmou a Washington que atrasaría a aprobación da reforma cando aínda non se anunciara a decisión.