O Goberno galés anunciou que esta sexta feira entrará en vigor un novo confinamento en Gales, unha medida con duración de dúas semanas e media que suporá o peche de establecementos non esenciais e a interrupción das clases nos centros de secundaria superior.
"A todos os galeses pediráselles que queden na casa", dixo o ministro principal, o laborista Mark Drakeford. Con esta medida, que dixo que será "curta" pero "drástica", o obxectivo é conter a segunda vaga de coronavirus que afecta ao país e a gran parte de Europa.
O encerro prolongarase ata o 9 de novembro, unha marxe que Drakeford dixo que "aforrará tempo".
Prohíbense as reunións con persoas que non sexan convivintes, agás as que viven soas, tanto dentro como fóra da casa e pecharanse os espazos de lecer e os templos relixiosos, agás os funerais e as vodas.
"Non hai decisións doadas agora que o virus está a entenderse rapidamente en Gales", dixo Drakeford. O goberno galés cre que sen medidas tan drásticas o sistema de saúde
público non poderá xestionar o aumento das infeccións e aumentará o número de mortes.
Houbo un forte aumento dos casos de Covid-19 en Gales nas últimas semanas e 35.000 desde o inicio da pandemia.
Segundo datos do sistema de saúde galés, máis de 1.700 persoas perderon a vida pola enfermidade.
