Escocia, Gales e Irlanda do Norte teñen os seus propios plans de desconfinamento, diferentes do marcado desde Londres

Apostan en manter polo momento un confinamento “duro” mentres Boris Johnson chama a “avanzar xuntas as catro nacións”.

Bandeiras das nacións do Reino Unido
photo_camera Bandeiras das nacións do Reino Unido

Boris Johnson debullou este domingo as diferentes fases e pasos para o plan de desconfinamento, un plan que o primeiro ministro do Reino Unido asume que será de aplicación unicamente en Inglaterra.

Escocia, Gales e Irlanda do Norte teñen os seus propios roteiros para a pandemia e as competencias para transformalos en procesos ou plans de desconfinamento.

De feito, a tras a comparecencia de Johnson para falar dde ritmos e fases de desescalada, a primeira ministra de Escocia xa dixo que este país non iría por ese camiño e que mantiñan o confinamento 'duro'. O mesmo fixo o Goberno de Gales. Ambos os dous consideran que non se dan as circunstancias para o desconfinamento.

O propio primeiro ministro do Reino Unido (que engloba Inglaterra, Gales, Escocia e Irlanda do Norte) chamou ás “catro nacións a camiñarmos xuntas” nesta pandemia.

A partir da cuarta feira

No plan de Johnson, a partir desta cuarta feira a xente poderá saír para facer exercicio ou desprazarse en coche particular a outros lugares. Sitúa a principios de xullo a volta ás aulas se ben só en determinados niveis e para xullo, “como moi cedo e sempre que sexa seguro”, a apertura de hostalería.

Anunciou, tamén, un incremento das sancións e multas para aquelas persoas que incumpran as normas e medidas de distanciamento social.

Reino Unido é o estado europeo onde máis vítimas polo coronavirus se rexistraron, superando as 32.000, e a cifra de persoas contaxiadas sitúase por riba de 213.000. Máis de 80% destes casos están en Inglaterra.

Non só no Reino Unido os seus territorios teñen competencias para deseñar e implementar os seus propios plans de desconfinamento. Isto tamén sucede en Alemaña (cos lander) ou Estados Unidos.(cos estados).

Comentarios