As enquisas apuntan a un aumento do apoio á independencia de Gales, até de 70% entre a mocidade

Gales viviu este sábado unha nova manifestación a favor da independencia, nun momento no que o movemento volveu gañar un apoio histórico. Desta vez convocouse na cidade de Y Barri. A mobilización da sociedade civil foi impulsada polos movementos AUOB Cymru (“Todos baixo unha soa bandeira, Gales”), que reúne  todos os partidarios da independencia, e a organización independentista Yes Cymru.

As mobilizacións multituinarias a favor dun estado independente son bastante recentes e, de feito, a primeira da historia de Gales non tivo lugar até o 11 de maio de 2019. Desde entón, convocáronse, como en Swansea, Caerfyrddin ou na capital, Caerdydd. A desta semana é a novena feita por este movemento.

En concreto, Y Barri é un lugar simbólico porque é onde o movemento nacionalista Cymru Fydd ('o Gales que vén'), fundado en 1866, que pretendía acadar o autogoberno, obtivo os seus primeiros representantes.

A aposta pola independencia galesa está a vivir agora un momento doce. Malia ter sido historicamente unha minoría, en comparación, por exemplo, cos escoceses ou irlandeses pro-unificación, unha enquisa recente revelou un novo pico de apoio, con 41% da poboación que votaría agora a favor da independencia. Entre os datos máis destacados estaba que o apoio subiu até 72% entre as persoas máis novas.

Un factor fundamental neste crecemento é a creación da plataforma Yes Cymru, que conseguiu achegar á independencia a persoas que nunca votaron por Plaid Cymru, o principal partido independentista. A plataforma está inspirada na campaña escocesa de 2014, que centrou o discurso en aspectos organizativos ou de modelo e non tanto na historia e a cultura: busca involucrar persoas de todos os partidos e orixes.

Máis alá do apoio ao partido independentista, hai un maior consenso a favor dun maior autogoberno, especialmente entre os votantes laboristas. Porén, cómpre sinalar que, no outro extremo, prodúcese un aumento sen precedentes da extrema dereita, representada por Reform UK de Nigel Farage.

De momento, na maioría das enquisas hai unha loita polo segundo posto entre a extrema dereita e o independentismo galés, que mellorou en catro puntos con respecto ás eleccións anteriores, e está a achegarse cada vez máis ao laborismo.

Entre outras iniciativas, atopamos que 20 concellos locais dos 22 existentes solicitaron a transferencia do control das posesións que ten a coroa británica á nación, como xa conseguiu Escocia en 2017.

Do mesmo modo, atopamos esforzos por parte do goberno laborista galés para promover a lingua galesa, que actualmente falan arredor de 850.000 persoas, é dicir, 28 % da poboación. Neste sentido, o mes pasado presentouse un novo plan quinquenal para acadar un millón de falantes para o ano 2050. A iniciativa ten como obxectivo garantir que as organizacións, tanto públicas como privadas, sitúen a lingua galesa "no centro" das súas actividades, co obxectivo de conseguir que máis xente a fale e a use, e crear as condicións e a infraestrutura para apoiala.

Ao mesmo tempo, no Parlamento está a ser tramitado un proxecto sobre lingua e educación que ten como obxectivo mellorar as competencias en lingua galesa dos nenos e mozos nas escolas.