'Daniel' arrasa Libia e causa máis de 5.000 mortes

Tras o seu paso por Bulgaria, Grecia e Turquía a pasada semana, onde provocou cando menos 18 mortes, a tormenta Daniel, xa convertida nun ciclón tropical mediterráneo, asolou Libia desde o domingo xerando un número “enorme” de falecementos, mentres que 10.000 persoas están desaparecidas no nordés do país, corroborou a terza feira Tamer Ramadan, enviado a Libia da Federación Internacional de Sociedades da Cruz Vermella e da Media Lúa Vermella. Asemade, informou de que a medida que pasen os días agardan que a cifra confirmada de falecementos se conte por milleiros, no medio de informacións contraditorias nun Estado que leva sumido nunha guerra civil desde que en 2011 a Organización do Tratado do Atlántico Norte lanzou unha intervención militar para acabar co liderado de Muamar al Gaddafi, que derivou no seu asasinato, segundo as fontes, cometido polos sublevados libios ou por un axente francés. Máis dunha década despois, a guerra civil deu paso a dous Gobernos, un no leste e outro no oeste do país, este último recoñecido pola Organización das Nacións Unidas (ONU), controlados por ducias de milicias armadas que se reparten o dominio do territorio e están conformadas por distintos grupos, desde ex funcionarios e militares durante a etapa de Gaddafi até filiais de Al Qaeda. Desde ese momento, “eleváronse os niveis de pobreza, de inseguridade alimentaria e de vulnerabilidade xeral”, explica un documento interno da ONU, en paralelo á falta de investimento en ámbitos como o da infraestrutura. Neste contexto, a cidade de Derna sufriu as peores consecuencias tras estoupar dous encoros polas inundacións xeradas por chuvias que superaron nalgúns puntos os 400 litros por metro cadrado con ventos de 180 km por hora. O primeiro ministro do Gabinete oriental, Ossama Hamad, fixo énfase en que a xestión do desastre está moi por riba das súas posibilidades, o que constatou Mahmoud Iftessi, da Xunta Nacional de Desenvolvemento Económico e Social, do Executivo occidental, que admite que “o desastre vai máis alá da capacidade da infraestrutura libia”, atribuíndoo a “un caos masivo durante 50 anos”. Funcionarios de Derna, unha das principais cidades libias, informaron a axencia AP que só na urbe hai 10.000 persoas reportadas como desaparecidas, á vez que a Autoridade de Ambulancias e Emerxencias, que dirixe os traballos de salvamento, comunicou que 2.300 persoas terían morto na cidade de 125.000 habitantes. Othman Abduljaleel, titular de Saúde do Goberno do leste, definiu como “catastrófico” o estado da localidade, na que “os corpos seguen tirados no chan en moitos puntos, os hospitais están cheos de cadáveres e hai áreas ás que aínda temos que chegar”, polo que reclamou “unha intervención internacional”. O ministro de Aviación civil dese Gabinete, Hichen Abu Chkiouat, trasladou á axencia Reuters que “25% da cidade desapareceu” e sinalou que foron recuperados máis de 1.000 corpos, adiantando que estimaban máis de 2.500 decesos en todo o país, antes de citar o incremento do número de persoas desaparecidas. “Hai cadáveres por todas partes, no mar, nos vales, debaixo dos edificios”, laiouse após visitar Derna. Porén, Abduljaleel apuntou á canle Al-Massar que a cifra definitiva de decesos agardada é de aproximadamente 10.000 persoas, e Anadolu Tareq al-Kharaz, voceiro de Interior, confirmou 5.200 falecementos só en Derna. Vídeos publicados polas persoas residentes nas redes sociais amosaban o río Wadi Derna desbordado e arrasando con edificios de apartamentos situados moi lonxe da vía fluvial, amais de críticas ao ritmo lento das tarefas de rescate. Ao tempo, o xornal The Guardian indica que “os residentes non recibiron ningunha advertencia inmediata de que os encoros corrían risco de estoupar”. A isto hai que engadir que a destrución polas chuvias torrenciais, que tamén afectaron cidades como Susa, Marj e Shahatt, impediu que a axuda gobernamental chegara até a terza feira, xunto aos primeiros equipos da Media Lúa Vermella. Aínda que Exipto, Tunisia, Alxeria, Turquía e os Emiratos Árabes Unidos ratificaron a súa colaboración coas tarefas de busca e rescate, un traballador de ambulancias de Derna, Khalifah Touil, apuntaba que polo de agora “non temos nada para salvar a xente, nin máquinas”. Tamén a ONU e outros países ofreceron axuda, así como o Goberno do oeste, que enviou un avión con 14 toneladas de subministracións médicas e persoal sanitario a Bengasi, controlada polo Executivo do leste, para ser distribuídas na zona afectada. Aínda así, as operacións de axuda humanitaria non escapan do contexto dunha guerra civil conxelada desde o acordo de alto o fogo entre ambos os dous Gobernos en 2020, e que xera importantes diferenzas incluso ao respecto da axuda. “Hai un enorme resentimento e unha fractura entre os dous bandos, hai resentimento incluso nas rúas sobre os motivos polos que o leste foi descoidado todo este tempo”, o que desencadea que até “os individuos e grupos que están tratando de axudar desde o oeste a través de automóbiles privados non son moi ben recibidos no leste”, debulla Hani Shennib, presidente do Consello Nacional de Relacións entre os Estados Unidos e Libia. Mudanza climática A Organización Meteorolóxica Mundial alertou que fenómenos como o que asolou Libia intensifícanse polo cambio climático ocasionado pola queima de combustíbeis fósiles, polo que agarda a medida que suba a temperatura “precipitacións máis extremas, o que provocará inundacións máis graves posto que o aire máis cálido retén máis humidade”. A pesar do compromiso de redución de emisións da última cimeira do G20, en paralelo a mudanzas na arquitectura financeira mundial dominada polos países occidentais, e logo do verán -no hemisferio norte- máis cálido desde que hai rexistros, un estudo cifra en case 3.500 millóns de euros o investimento en 2022 do Banco Mundial en combustíbeis fósiles. Case 3.000 mortes en Marrocos Por outra parte, medios marroquís aumentaron a terza feira a 2.901 o número de decesos confirmados polo terremoto de magnitude 6,8 na escala de Richter que abateu na noite da sexta feira ao sábado o centro do país, e que deixou 5.530 persoas feridas. A resposta de Rabat ao sismo, que amais das zonas turísticas tivo un forte impacto en áreas rurais, está a causar unha “crecente frustración” entre a poboación, reportou France24, após limitarse a catro os Estados dos que se aceptou a súa axuda, mentres hai aldeas destruídas ás que a terza feira aínda non chegaran os equipos de rescate. Marrocos confirma máis de 2.900 mortos e 5.500 feridos após o terremoto