Complícase a continuidade do estado de alarma: ERC tamén votará en contra
A executiva nacional de Esquerra Republicana de Catalunya (ERC) vén de anunciar que o seu grupo parlamentar no Congreso das Deputadas votará en contra da continuación do estado de alarma a partir do vindeiro 10 de maio durante outros 15 días, como solicitou o Goberno español.
"O estado de alarma non é o mecanismo axeitado", conclúen desde a formación republicana, que esta cuarta feira dirá "non" a pesar de terse abstido nas anteriores votacións. E faino cunha nova crítica ao "centralismo" na xestión da crise do coronavirus.
"Demostrouse que non o era durante toda esta crise e así o denunciamos. A centralización foi un erro. Abstivémonos por responsabilidade e para dar un voto de confianza ao goberno español. E pedimos rectificación na retirada de competencias e espazos de soberanía. Non o fixeron. Non escoitaron. Non podemos seguir dando os nosos votos para facilitar este estado de alarma", aseguran nun comunicado.
Desde ERC inciden en que a Generalitat de Catalunya ten que poder xestionar directamente a desescalada "sen ter que esperar autorizacións nin rectificacións, sen duplicidades de traballo e sen pedir permiso para facer aquilo polo que a cidadanía nos elixiu".
Votación esta cuarta feira
No mesmo sentido, mais con outros argumentos, manifestarase o Partido Popular no Congreso. O seu líder, Pablo Casado, sostivo esta mañá que non apoiarán a prórroga que se vota esta cuarta feira e falou de "chantaxe" do Executivo de Pedro Sánchez.
O Goberno xa trasladou o "caos" que provocaría non sacar adiante a prórroga do estado de alarma tanto no eido sanitario como no económico. O certo é que o os únicos votos afirmativos confirmados até o momento son os dos partidos da coalición: PSOE e Unidas Podemos.
Pola súa banda, o PNV tiña previsto manter unha reunión esta tarde para decidir o sentido do seu voto. Con todo, membros do partido nacionalista vasco sinalaron que o Goberno español debe permitir que cada territorio recupere as súas competencias durante a fase actual da crise para lograr o seu apoio nesta nova prórroga.
Nesta liña sitúase o BNG, que aínda non anunciou o sentido do seu voto. O seu deputado no Congreso, Néstor Rego, salientou desde o comezo da crise que a "centralización" era un "erro" e criticou a elección da "provincia" como unidade para os plans de desconfinamento do Executivo de Sánchez.
Na votación da prórroga anterior Junts per Catalunya, a CUP e Vox xa votaron en contra.