O CIS reduce as opcións do PP de arrebatarlle ao PSOE gobernos autonómicos

Ás 00 horas da sexta feira comezou a campaña electoral no Estado español para elixir as composicións dos Parlamentos de 12 comunidades e das dúas cidades autónomas, así como das Corporacións municipais de máis de 8.000 concellos. Na véspera do comezo da campaña, o Centro de Investigacións Sociolóxicas (CIS) difundiu unha enquisa na que coloca o PSOE como o potencial gañador en papeletas dos comicios municipais cunha estimación de voto de 31,7%, máis de catro puntos por riba do Partido Popular (PP), mentres que as candidaturas de Podemos e Izquierda Unida (que van por separado en moitas localidades) ficarían con 7,9% e as de Vox con 6,8%. Porén, no que atinxe ás eleccións autonómicas, que non se producirán na Galiza, Euskadi, Catalunya, Andalucía e Castela e León, é precisamente o PSOE quen máis se xoga, ao liderar o Goberno en nove das doce comunidades nas que se votará -e ao participar nun décimo Executivo-, por dúas do PP. En todo caso, e con moitos lugares en disputa, o instituto demoscópico español abre a porta a que os conservadores non consigan o poder en máis comunidades, nunha proba de fogo para o liderado de Alberto Núñez Feixoo e nuns comicios marcados polas eleccións estatais que decorrerán poucos meses despois. O PP, primeira forza en seis autonomías Nas dúas comunidades que gobernan, Madrid e Murcia, é onde as enquisas amosan un resultado máis claro, adiantando unha nova vitoria do PP. Na primeira, Isabel Díaz Ayuso quedaría con entre 61 e 70 escanos, segundo o CIS, con posibilidades de alcanzar a maioría absoluta de 68 escanos e de non precisar do ultraespañolismo de Vox para aprobar as súas propostas, como veu acontecendo até o de agora, e con Más Madrid consolidándose como segunda forza por diante do PSOE. En Murcia, que iniciou o conflito entre o PP e Ciudadanos que derivou na práctica desaparición desta última organización, incluso no rango máis baixo da estimación de voto PP e Vox poderían gobernar. Aliás, o PP imporíase como primeira forza en Cantabria, Aragón, A Rioxa e o País Valencià, o que non quere dicir que poida sumar suficientes representantes coa extrema dereita para formar un Executivo. En Cantabria, isto só pasaría no mellor escenario para estes partidos en base aos datos do CIS, que recollen o sorpasso do PSOE ao Partido Regionalista de Miguel Ángel Revilla, que non podería encabezar a comunidade por quinta ocasión. No que atinxe a Aragón, o CIS sinala que non chegarían polo de agora a eses números, quedando ao bordo da maioría absoluta no rango superior da súa estimación de voto, nun lexislativo no que irrompería Aragón Existe como cuarta forza. Tamén manteñen esperanzas para o CIS na Rioxa e no País Valencià. No norte do Estado é onde contan con máis posibilidades de superar o PSOE e Unidas Podemos, cunha estimación entre PP e Vox de entre 15 e 17 escanos, esta última cifra é a que marca unha maioría absoluta que adianta a media das enquisas electorais no lugar. Aínda que esta media tamén os leva até 51 -un máis da maioría- no País Valencià, o CIS salienta que nestes momentos o PSOE e Compromís estarían perto de poder reeditar o acordo do Botànic con Ximo Puig á cabeza e sen precisar de Unidas Podemos. Arredor dos comicios nas Illes Balears, o CIS rachou coa tendencia da media das enquisas, que colocaban os conservadores como primeira forza, e dá cinco puntos de vantaxe ao PSOE de Francina Armengol sobre o PP e máis de seis ás forzas progresistas fronte ás conservadoras cun incremento con respecto a 2019 das forzas soberanistas Més per Mallorca e Més per Menorca, nunha zona da que non foi emitido un cálculo de escanos. Gobernos progresistas Pola contra, no resto do Estado os estudos demoscópicos apuntan a unha probábel vitoria das forzas progresistas, que aínda permitindo ao PSOE manter o liderado dos Gobernos obrigaría a pactar con outras formacións agás en Castela-A Mancha, cun Emiliano García Page con moitas posibilidades de manter a maioría. Non así en Estremadura, onde Guillermo Fernández Vara precisaría de Unidas Podemos. O CIS tampouco efectuou estimación de escanos en Asturias, lugar no que a porcentaxe de voto das forzas progresistas supera 51%, o que permitiría repetir a Adrián Barbón o pacto con Podemos e coa coalición de Izquierda Unida, Más País e Izquierda Asturiana. Asemade, as particularidades do sistema electoral canario impediron tamén unha equivalencia en representantes, así e todo semella claro que o PSOE con Ángel Torres volverá ser primeira forza e poderá gobernar con Unidas Sí Podemos, Nueva Canarias, Drago Verde e a Agrupación Socialista Gomera. Geroa Bai e EH Bildu, perto da segunda posición En Nafarroa, a estimación de voto deixa case garantido un Goberno progresista, ao ficar moi lonxe da maioría absoluta a suma de Unión del Pueblo Navarro (UPN), o PP e Vox. Aínda así, mantén aberto quen encabezará o vindeiro Goberno foral, pois aínda que para o CIS o PSOE de María Chivite continúa por diante das soberanistas Geroa Bai e EH Bildu, as tres formacións atópanse nunha marxe de tres puntos porcentuais e cun cálculo de escanos case idéntico. Ao respecto das cidades autónomas, en Ceuta os conservadores e a extrema dereita obterían sufraxios suficientes para conformar un Executivo, subliñan as enquisas publicadas nas últimas semanas, o que non está tan claro en Melilla, con opcións para Coalición por Melilla de integrar un Gabinete de coalición co PSOE. O PNV mantería a Alcaldía de Bilbo e Compromís a de València A enquisa do CIS reflicte a fortaleza das forzas soberanistas nas eleccións a nivel municipal, superando conxuntamente as cifras de Podemos-Izquierda Unida e Vox, terceira e cuarta forza a nivel estatal. O traballo concede 2,5% da estimación de voto estatal a Esquerra Republicana de Catalunya (ERC), apenas 0,1% máis que a Junts, por 1,4% de Compromís, EH Bildu e Partido Nacionalista Vasco (PNV). Entre os concellos nos que se levou a cabo un estudo particular, a institución sociolóxica indica que en Bilbo o PNV ten unha importante vantaxe e faríase con 11-13 concelleiras e concelleiros, o dobre que EH Bildu e o PSOE, co que podería repetir Goberno. Na capital catalá, Barcelona, lidera as enquisas En Comú Podem, co PSOE a menos de tres puntos. En València, Compromís poderá manter o bastón de mando co apoio do PSOE, e en Madrid, a capital española, o PP non ten asegurado seguir coa Alcaldía, ao producirse un empate en estimación de voto de Más Madrid e PSOE con PP e Vox, e cuxo desempate dependerá de se Unidas Podemos ou Ciudadanos -agora no límite da representación- conseguen entrar finalmente no consistorio.