A China e os Estados Unidos cruzan promesas de paz en Ucraína

O enviado especial chinés para abordar a implementación da proposta de paz do país asiático para un cesamento de hostilidades en Ucraína, Li Hui, afirmou a sexta feira que nin Kíiv nin Moscova “fecharon a porta ás negociacións”, debullando que a pesar da existencia de “desafíos importantes para convocar negociacións e alcanzar resultados tanxíbeis” é “crucial que alguén dea un paso á fronte para impulsar a creación de consenso e estabelecer un terreo común”, incidindo en que Beijing está preparado para traballar na redución da “fenda entre as posicións de ambos os lados”. Tras levar a cabo unha xira diplomática nas últimas semanas de maio por Ucraína, Polonia, Francia, Alemaña, Rusia e Bélxica, para reunirse coa Unión Europea, tras a conversa mantida entre o presidente chinés, Xi Jinping, e o seu homólogo ucraíno, Volodimir Zelenski, Li fixo fincapé en que “se realmente queremos pór fin á guerra, salvar vidas e lograr a paz é importante que deixen de enviar armas ao campo de batalla, ou do contrario as tensións aumentarán”. Nesa liña, resolveu que “todas as partes deben garantir a seguridade das instalacións nucleares e tomar medidas concretas para baixar a temperatura”, alertando de que o “risco dunha escalada da guerra entre Rusia e Ucraína segue a ser alto” e reiterando que a China “está do lado da paz” para acabar cunha crise que “nin comezou nin alimentou”. En paralelo, informou de que están a avaliar o envío doutra delegación a Europa para tratar a fin da guerra, e destacou que todos os interlocutores cos que falou “recoñecen os nosos esforzos e a todos lles gustaría unha solución pacífica”, após a intervención esta semana da presidenta do Executivo da Unión Europea, Ursula von der Leyen, recalcando que está en contra dun alto o fogo no conflito e insistindo na necesidade de aumentar os envíos de armamento a Ucraína. Tamén os Estados Unidos sostiveron unha postura semellante ao divulgarse a proposición chinesa, á que seguiron outras do Brasil ou dos países africanos, porén, o secretario de Estado, Antony Blinken, proclamou onte que Washington “acolle calquera iniciativa que permita a ambos os países sentar á mesa de conversación”, nunha visita a Helsinki, Finlandia. Aliás, trasladou que están a traballar con Kíiv para impulsar un consenso sobre os elementos chave dunha “paz xusta e duradeira”, reiterando o seu apoio aos esforzos doutros Estados para “atopar o camiño” cara á paz. Asemade, considerou a guerra “un erro estratéxico de Rusia” e subliñou que “está máis illada que nunca a nivel internacional”, aínda que tres cuartas partes dos países non aceptaron impor as sancións coercitivas aplicadas polos membros da Organización do Tratado do Atlántico Norte (OTAN). Blinken tamén puxo o foco na integridade territorial, facéndose eco da proposta de paz de Ucraína, que exixe a retirada rusa das rexións ucraínas adheridas a Moscova nuns referendos non recoñecidos pola Organización das Nacións Unidas, á vez que Zelenski abundou na defensa da súa propia iniciativa como base para o debate. Arredor desa cuestión, Li definiu como “totalmente falsa” unha reportaxe do medio estadounidense The Wall Street Journal que defendía que durante a súa xira tratou de obter o recoñecemento dos membros do bloque comunitario á soberanía rusa nestas rexións, o que tamén foi negado polo titular de Exteriores ucraíno, Dmitro Kuleba. Li cualificou a publicación como un intento de interromper os lazos entre Beijing e Kíiv. As declaracións de Blinken producíronse despois de que os membros da OTAN repetiran que calquera conversa para o cesamento de hostilidades tiña que decorrer con posterioridade á anunciada contraofensiva ucraína -da que non hai indicios polo de agora-, argumentando que isto daría a Kíiv no caso de éxito militar unha mellor posición á hora de negociar. Ucraína na OTAN Pola súa parte, o voceiro do Kremlin, Dmitri Peskov, aseverou que Rusia non deixará de aplicar medidas para garantir a súa seguridade, e “iso exclúe a expansión da OTAN e o seu achegamento directo ás nosas fronteiras, tamén a través da entrada de Ucraína”, despois de que Zelenski instara a alianza militar liderada polos Estados Unidos a concretar esta posibilidade e brindar garantías de seguridade a Kíiv. Peskov sinalou que as ambicións de Kíiv na OTAN amosan a falta de vontade para resolver a situación por medio da negociación. O ministro de Defensa británico, Ben Wallace, apuntou que “o mellor que podemos facer para axudar Ucraína agora é axudalos a derrotar Rusia”, engadindo que non poden ingresar países que se atopen no medio dun conflito bélico. Ademais, revelou que “estamos a quedar sen armas” para enviar a Kíiv, tras remitirlle a alianza militar máis de 70.000 millóns de euros en armamento, e indicou que cos seus aliados agardan “entregar armamento e fondos a Ucraína sen a necesidade de premer as autoridades de Kíiv para que inicien negociacións con Rusia”. Este volume de armas, que xa levou a denuncias de autoridades europeas polo aumento do tráfico cara a outros países, xerou preocupación tamén polas cifras de armas sen rexistrar que ficarían en circulación en Ucraína unha vez rematado o conflito. O ministro de Interior ucraíno, Igor Klimenko, comunicou que “non temos esas estimacións no país”, pero aludiu aos datos proporcionados polos “socios europeos” de que haberá “quizais, até tres millóns de armas”. Ao respecto, a Cámara de Representantes de Suíza rexeitou un proxecto para autorizar a exportación a Ucraína de material bélico suízo vendido a outros países, que solicitaran o permiso para envialo a Kíiv, como Alemaña, Dinamarca, Países Baixos ou o Estado español. Ataques contra Kíiv e a fronteira rusa No aspecto militar Rusia volveu lanzar un novo ataque contra Kíiv, que xa padeceu unha vintena de ondas de bombardeos desde comezos de maio, entrementres, Ucraína optou por concentrar os seus ataques nas rexións rusas fronteirizas, nesta ocasión Briansk e Belgorod, onde faleceron dúas persoas. Amais, Washington ratificou que deixaron de notificar a Rusia sobre "o estado ou a localización" de parte do armamento que comprende o Novo Tratado de Redución de Armas Estratéxicas, após Moscova anunciar a súa retirada do pacto, o que aínda non fixo de maneira formal.