Aumentan a máis de 8.700 as mortes polos terremotos en Turquía e Siria mentres Ancara acumula boa parte da axuda

Áté 23 millóns de persoas estarían afectadas polos terremotos da segunda feira na provincia turca de Kahramanmaraş, que causaron graves danos no sur de Turquía e no norte de Siria, destacou esta terza feira Adelheid Marschang, oficial superior de emerxencias da Organización Mundial da Saúde (OMS). Asemade, indicou que “a infraestrutura civil e potencialmente a infraestrutura sanitaria foron danadas en toda a rexión afectada”, nunha zona onde viven arredor de cinco millóns de persoas que a entidade considera en estado de vulnerabilidade. Á hora de feche desta edición, as autoridades turcas e sirias puideron confirmar a morte de máis de 8.700 persoas, 6.234 en Turquía e 2.530 en Siria. O número de feridos supera as 37.000 persoas. Amais, o vicepresidente turco, Fuat Oktay, informou de que máis de 8.000 persoas foron rescatadas entre os cascallos e outras 338.000 pasaron a noite en residencias de estudantes, universidades e escolas. No país otomán, Murat Kurum, ministro de Medio Ambiente e Urbanismo, asegurou que 13,5 millóns de persoas foron “directamente afectadas” polos terremotos e as máis de 300 réplicas posteriores. Entrementres, a OMS alerta de que o número de falecementos produto dos sismos pode superar os 20.000. As operacións de rescate avanzan a marchas forzadas coa esperanza de atopar o maior número de superviventes. O enlace da Organización das Nacións Unidas (ONU) coa axencia de rescate turca AKUT, Belit Tasdemir, fixo fincapé nas dificultades engadidas da onda de frío que está a sufrir a rexión, que fai máis difícil que as persoas atrapadas polos restos das edificacións destruídas poida aguantar “até que o persoal de rescate poida chegar a eles”, e que á vez ten “efectos adversos sobre o propio persoal que traballa en condicións de conxelación, sobre todo durante a noite”. A isto hai que sumar o feche de catro aeroportos en Turquía polas consecuencias do movemento de terra. En Siria, Madevi Sun-Suon, voceira da Oficina de Coordinación da Asistencia Humanitaria das Nacións Unidas, explicou a Reuters que “algunhas estradas están rotas, outras son inaccesíbeis”, polo que detiveron a entrega de axuda humanitaria que entraba desde Turquía, asegurando que non saben cando se reactivará. Axuda desigual Após case doce anos de guerra civil, os servizos públicos sirios xa se atopaban ao límite antes dos sismos, cunha importante destrución no país froito do conflito. Isto levou a OMS a salientar que “as principais necesidades insatisfeitas poden estar en Siria no inmediato e a medio prazo”. Isto non evitou que na asistencia ofrecida por máis de 45 países para colaborar nas accións de rescate e de axuda humanitaria a inmensa maioría se dirixiran só a Turquía, un grupo no que se atopan os Estados Unidos, o Reino Unido ou á Unión Europea (UE), ratificou Al Jazeera. Pola contra, entre os países que enviaron asistencia a Siria -ademais de a Turquía-, están Alxeria, a China, Rusia, Armenia, Xordania, Venezuela, os Emiratos Árabes Unidos e Nova Zelandia. O voceiro do Departamento de Estado estadounidense, Ned Price, fechou a porta a contactar co Goberno sirio porque “sería bastante irónico, incluso contraproducente”. En paralelo, o primeiro ministro israelí, Benjamin Netanyahu, anunciou o envío de axuda a Siria tras unha suposta solicitude. “Como pode Siria pedir axuda a unha entidade que matou sirios durante décadas?”, contestou Damasco, criticando que Tel Aviv trate de politizar a traxedia após trasladar á ONU que o país está preparado para coordinar a axuda en “todo o territorio”. Pola súa parte, a ministra de Asuntos Exteriores de Alemaña, Annalena Baerbock, deixou entrever que culpabiliza o Executivo sirio de Bachar al Assad de obstaculizar a axuda e aseverou que “todos os actores internacionais deberían exercer presión sobre o réxime sirio para garantir que a axuda humanitaria poida chegar”. Arredor desta cuestión, o director para Asia Occidental do Comité Internacional da Cruz Vermella, Fabrizio Carboni, solicitou á comunidade internacional que o nivel de solidariedade con Siria sexa o mesmo que con Turquía, e pediu separar a axuda “das diverxencias políticas e militares”. “Agora hai unha oportunidade única para restabelecer o enfoque humanitario e despolitizalo”, destacou, reclamando que “suceda moi rápido porque cada día, cada hora que deixamos pasar isto, a xente está pagando o prezo”. Guerra en Siria A pesar dos avances militares do Executivo sirio, que recuperou grazas á asistencia militar que solicitou a Rusia o control de boa parte do territorio tras vencer coa axuda kurda o Estado Islámico, precisamente no norte do país é onde a oposición mantén o seu principal bastión e o dominio de aproximadamente 10% do territorio sirio. Os principais grupos que conforman a oposición son organizacións terroristas con vencellos especialmente con Al Qaeda, e que están a recibir un importante apoio de Turquía, que construíu máis de 100 bases militares no lado sirio da fronteira, desde onde lanza reiterados ataques contra as forzas kurdas. Ancara quere unha franxa de 30 km no país na que propuxo relocalizar os máis de tres millóns de refuxiados sirios que se atopan en Turquía. Tanto a oposición como o Estado Islámico foi quen de tomar nun primeiro momento amplas zonas do país a raíz dos ataques aéreos dos Estados Unidos, Reino Unido, Francia ou Israel contra as posicións do Goberno sirio, nunha medida apoiada pola UE, que mantén sancións unilaterais contra Damasco. Amais, Washington está a prolongar a ocupación da zona onde se sitúan boa parte dos campos de petróleo en Siria. Onte mesmo, a pesar das operacións de rescate en curso, Turquía lanzou un novo ataque contra as forzas kurdas en Siria. A axencia siria SANA debullou que o “impacto das sancións occidentais e a ocupación militar estadounidense socavou a capacidade de responder a grandes desastres naturais”. Os sismos golpean os palestinos en Siria Entre os damnificados hai 57.000 refuxiados palestinos que viven nos tres campos de refuxiados do norte sirio, país que acolle a 438.000 palestinos ao longo do territorio de Siria, pois Damasco acolleunos historicamente tras a invasión israelí, sinalou Tamara Alrifai, a voceira da axencia da ONU para os refuxiados palestinos, que sostivo que precisan de forma urxente 2,5 millóns de euros para cubrir as necesidades dos refuxiados. O xefe da axencia, Philippe Lazzarini, subliñou que “o sismo engade unha capa incríbel de miseria” en Siria.