Un acto público aberto na Facultade de Ciencias de Comunicación de Compostela este sábado 21 de febreiro ás 12:00 horas será o principio da andaina de Somós Nós, unha iniciativa que quer a partir desta data “iniciar un proceso constituínte como movemento social para crear país”, segundo afirmaron fontes consultadas por Sermos Galiza. Alén das 200 persoas que con nome e apelidos apoiaron como promotores a aparición de Somos Nós, hai máis de 1.000 adhesións acadadas nestas semanas a este proxecto a través das redes ou de mail, segundo afirman ditas fontes. “Hai un interese real e hai unha gran expectación”, conclúen.
O acto non vai ser un acto político clásico e moito menos un mitin. Vai ser “modesto, breve e no que se reflicta o sentido de comunidade”. Unha xornada para definir prioridades de traballo e o modelo organizativo interno, “e todo iso a decidir coa participación das persoas”.Estas fontes consultadas queren clarificar que nin o acto nin o proxecto “son para maior gloria de Anxo Quintana”, en referencia ao ex portavoz nacional do BNG e ex-vicepresidente da Xunta e rostro máis visíbel deste movemento. Porque o que se pretende é “iniciar o proceso constituínte dun movemento social que quere crear país, que pretende que Galiza exista politicamente, que se lle respecte”.
O que tamén teñen claro en Somos Nós, en base a ese relato, é que non son un partido político nin queren competir neses parámetros, e que teñen claro que as solucións ás necesidades e demandas de Galiza “non van vir desde Madrid goberne alí A, B ou C”. O deste sábado e en Compostela será unha aposta, din, por sumar nese proceso do pobo galego que ao longo da historia deu lugar a feitos como as Irmandades da Fala ou Nunca Máis.