Losantos contraataca e di que El País é agora a canle de información habitual de Bárcenas
O editor de Libertad Digital, Federico Jiménez Losantos, nega ter recibido sobres en negro de Bárcenas, embora o seu nome apareza nos papeis publicados hoxe por El País. Losantos, coñecido pola súa liña ultradereitista, contraataca e afirma que El País é agora "a canle de información habitual" de Bárcenas.
Jiménez Losantos nega ter sido financiado polo Partido Popular, formación que desde as institucións que goberna si ten favorecido a Libertad Digital en distintos concursos de adxudicacións de frecuencias televisivas e radiofónicas.
Segundo os papeis de Bárcenas, en 2004, Libertad Digital tería recibido 30.000 euros das arcas do PP.
"Por 30.000 euros non imos vender a nosa inocencia. Somos pardillos, mais non idiotas", afirmou Losantos, quen en ton de brincadeira dixo que, de aparecer o diñeiro, o doaría a Cáritas.
Dito iso, o xornalista acusou o grupo Prisa de se ter tornado na "canle de información habitual" de Bárcenas.
