Os 69 traballadores que non se acolleron con anterioridade ás baixas incentivadas do ERE asinaron a carta de despedimento facendo constancia da súa oposición ao peche da fábrica máis de setenta e cinco despois da súa inauguración. A Fábrica de Armas fora privatizada polo goberno do PP, sendo Aznar presidsente, pasando ás mans da multinacional estadounidense General Dynamics que agora pecha a factoría da Coruña.
Como despedida, unha roda de prensa ás portas da fábrica deixaba á vista o rexeitamento dos representantes dos traballadores diante do peche da empresa. O presidente do comité de empresa Roberto Teijido lamentou que os traballadores se atoparan “orfos de presidente, esta é unha decisión empresarial pero cunha grande carga política, tanto na decisión que avala o Ministerio de Defensa como na falta de decisión da Xunta de Galicia” sinalou despois de definir a situación de “xenocidio industrial”. Lamentou tamén que o propio Feijóo desdiga a posición dos conselleiros de Industria, Traballo e o Igape que deron o visto bo ao plan industrial que frearía o peche da fábrica.
Mália que o das 14.30 horas foi a derradeira quenda de traballo, anuncian a continuación das mobilizacións para defender un proxecto industrial como alternativa ao peche. Mantiñan a intención de se pechar nas instalacións da factoría rexida pola General Dynamics que ofreceu a quince traballadores a posibilidade de se trasladar a Granada, oferta que foi aceptada por tres persoas. Fixeron tamén un chamamento á cidadanía para que se sume á oposición ao peche da fábrica e participe nas mobilizacións.