Ugia Pedreira: "Son unha adicta á poesía e o meu interese actual está enfocado na musicalidade da fala"

Conxunción política, antropolóxica, literaria e musical. Así define Ugia Pedreira o seu novo disco, Segmento cantábrico, que contén tamén un pequeno poemario, Atalaia norte. Un traballo que é porto, a Mariña e o noroccidente asturiano, e singradura polos pobos de Ortegal a Ouessant. Que é canto, poema e spoken word con percusión ou sintetizadores vintage. Que é, sendo quizais o seu álbum máis persoal, tamén tribo. Vida comunal. Diálogo, pensamento. Arte que é vida e vida que é arte. Como ela di, levar a arte pegada aos ósos.