A Panadaría: "Non é a primeira vez que, nunha escena na que dúas mulleres se bican, nos berran "Viva España!".

Coñeceron o éxito co seu primeiro espectáculo, Pan pan, e o fracaso co segundo, Panamericana. O terceiro, Elisa e Marcela, consagrounas a nivel galego e estatal, e a súa actual montaxe sobre as camareiras de piso da hostelaría, As que limpan, xa as transformou nunha referencia ineludíbel do teatro galego. Ailén Kendelman, Noelia Fernandez e Areta Bolado, A Panadaría, levan a escena unha particular fórmula de humor, feminismo e crítica social polos teatros de toda a península esnaquizando tópicos a través da risa e da ironía.