Esther Carrodeguas: Iribarne sobe a escena

Iribarne, o espectáculo escrito por Esther Carrodeguas e posto en escena por ButacaZero, a súa propia compañía -en coprodución co Centro Dramático Nacional e a Mostra Internacional de Teatro de Ribadavia-, vén de estrearse na Galiza despois de estar cinco semanas en Madrid co teatro cheo todas as noites. Unha biografía de Manuel Fraga Iribarne que indaga nas partes que non se contaron da chamada transición, dun pasado político que segue oculto por demasiados silencios. A obra está hoxe en Compostela e xirará nas próximas semanas por Galiza e polo Estado.