A Galiza alcanzou en decembro de 2022 o prezo máximo histórico na Galiza en vivendas en réxime de alugueiro, chegando a estar o metro cadrado a 7,96 euros ao mes, segundo o Índice Inmobiliario do portal inmobiliario Fotocasa, que ten rexistros desde o ano 2006. Deste modo, o estudo apunta que as catro provincias galegas chegaron a máximos nalgún momento durante o pasado ano. Así, Pontevedra alcanzou este punto en xuño con 9,79 euros o metro cadrado ao mes, aínda que fechou o exercicio a 8,98 euros/m2.
Nesta liña, Lugo e A Coruña tiveron os seus prezos máximos en xuño e agosto, con 6,90 euros o metro cadrado ao mes e 7,85, respectivamente. Namentres, Ourense é a provincia máis barata, situándose o seu prezo máis alto en novembro con 6,35 euros o metro cadrado ao mes.
Así as cousas, as catro capitais de provincia chegaron a máximos históricos, situándose a cidade da Coruña como a máis cara co metro cadrado a 9,58 euros ao mes.
Un informe presentado esta mesma semana pola Federación Galega de Empresas Inmobiliarias (Fegein) cifrou en 2.950 as vivendas dispoñíbeis actualmente no conxunto do país para alugar.
Datos estatais
No conxunto estatal, un total de 13 comunidades autónomas alcanzaron o prezo máximo no alugueiro. Así, o prezo do arrendamento alcanzou máximos en tres ocasiones —maio, xuño e xullo— e fechou o exercicio cun prezo medio de 11,03 euros o metro cadrado ao mes.
A primeira comunidade que alcanzou máximos en 2022 foi A Rioxa, que o pasado mes de xuño alcanzou a súa marca con 8,40 euros o metro cadrado ao mes, e que terminou o ano con 7,88.
Cantabria, Castela e León, Estremadura e Murcia alcanzaron o seu máximo en xullo, mentres Asturias fixo o propio en agosto. Nafarroa e Euskadi chegaron á súa marca en novembro e en decembro foron Andalucía, Balears, Canarias e o País Valencià.
Así, Catalunya, Madrid, Aragón e Castela-A Mancha son as únicas comunidades que non alcanzaron máximos históricos no prezo medio do alugueiro durante o pasado exercicio.
