Trump anuncia un arancel adicional do 10% á madeira e outro do 25% aos móbeis feitos con este material
O presidente dos Estados Unidos, Donald Trump, anunciou esta segunda feira a imposición, a partir do próximo 14 de outubro, dun arancel adicional do 10% ás importacións de madeira branda e produtos derivados da madeira, mentres que cobrará un novo gravame do 25% por armarios e outros móbeis elaborados con este material.
Así o recolle un texto difundido pola Casa Branca no que o mandatario estabeleceu ademais que estas novas taxas pasarán, a partir do 1 de xaneiro de 2026, do 10 ao 30% para a madeira branda e a madeira aserrada estranxeira, utilizada nunha ampla variedade de materiais de construción; e do 25 ao 50% no caso dos móbeis de cociña "terminados así como as pezas importadas para o seu uso" nos mesmos.
Estes gravames "continuarán vixentes, excepto para os países cos que os Estados Unidos alcance un acordo que aborde a ameaza de menoscabo á seguridade nacional que representan as importacións de produtos de madeira", agregou Trump nun escrito que incide en que estes aranceis "súmanse a calquera outro dereito, imposto, taxa, exacción ou cargo aplicábel aos devanditos produtos de madeira importados".
O inquilino da Casa Branca indicou que estas medidas son o resultado dunha investigación ordenada en marzo ao Departamento de Comercio e concluída o pasado mes de xullo e asegurou que "fortalecerán as cadeas de subministración, reforzarán a resiliencia industrial, crearán postos de traballo de alta calidade e aumentarán a utilización da capacidade nacional para os produtos de madeira".
O presidente estadounidense avanzou a pasada quinta feira unha taxa adicional do 30% aos "móbeis tapizados" e outra do 50% a "todos os móbeis de cociña, tocadores de baño e produtos relacionados", unha medida que afirmou entraría o 1 de outubro. Ese mesmo día está previsto que estean vixentes un arancel do 100% a todos de produtos farmacéuticos "de marca ou patentado" e outro do 25% aos camións de gran tamaño.
