Volven as tractoradas en demanda de solucións ante a nova PAC

As cidades de Compostela, A Coruña, Lugo e Ourense xunto coas vilas de Lalín (Deza), Ortigueira (Ortegal), Vimianzo (Terra de Soneira), A Gudiña (Viana), Ribadeo (A Mariña) e Pedrafita (Os Ancares) viviron esta terza feira unha xornada de protestas do agro galego con tractoradas e mobilizacións convocadas polo Sindicato Labrego Galego (SLG), a Asociación Agraria da Galiza (Asaga) e Unións Agrarias (UUAA). Desde a Federación Rural Galega (Fruga) amosaron o seu apoio ás protestas mais non participaron directamente por non contar "cunha comunicación fluída" coas entidades citadas. Fruga e SLG fan chegar ás forzas políticas cadansúas propostas para o sector agrario Durante as concentracións, que arrodearon o edificio da Xunta en San Caetano (Compostela) e causaron cortes de tráfico en varios lugares, procedeuse á lectura dun manifesto no que se salientaba “visualizar o malestar existente” para “reclamar solucións aos problemas” que afectan ao sector, centrándose na "excesiva burocratización" da nova Política Agraria Común (PAC). Na reivindicación cargaron contra as exixencias “que chegan desde Europa, Madrid e a Xunta” e que poden “condenar ao feche” moitas explotacións. A protesta vista en primeira persoa Eva Rodríguez é unha gandeira que apoia as mobilizacións. Ten 47 anos e traballa no municipio de Cesuras (comarca de Betanzos) que conta cunha explotación dedicada ao leite cunha cabana de 70 animais, 40 en produción. No seu día a día, explica a Nós Diario, vive nos últimos anos “o aumento da burocratización”, unha circunstancia que lle afecta “no progresivo afastamento do noso traballo, con decisións que saen desde despachos sen baixar á terra”. Ante esta situación, asegura que non lle queda outra que “ou contar con servizos de terceiros para levar a xestión, persoas que non están na granxa con nós, ou prescindir de estar máis horas ao coidado dos animais”. Fruga denuncia o “abatemento” de animais sans na campaña de saneamento Outro gandeiro, Hugo Martínez, de 46 anos, ten unha explotación de razas autóctonas dedicada á carne en Tomiño (Baixo Miño) con 120 ovellas, 20 cabras e, entre vacas e tenreiras, 40 animais máis. Participou esta terza feira na mobilización de Lalín e amosa o seu descontento afirmando, en declaracións a Nós Diario, que “a fiscalización burocrática ten que ser proporcional e non como queren que sexa agora”. Neste sentido, denuncia que “as grandes explotacións poden ter parcelas dimensionadas e posibilidades de varios veterinarios mais as pequenas non”. Na comarca de Ordes traballa José Manuel Liste, de 39 anos, levando unha granxa en Trazo dedicada ao leite con 200 animais, a metade en produción. Participou na mobilización de Compostela molesto, como explica a Nós Diario, “cos cambios que hai cada ano” nas normas que lles afectan mentres “non se cumpre a lei de cadea alimentaria”. Neste punto, demanda “con urxencia” que haxa “mediación” para que deixe de prexudicarlles. O SLG acusa a Xunta de non executar unha sentenza sobre axudas a granxas de carne Dixitalización e controis no rural galego Entre os atrancos que teñen as explotacións na Galiza, un dos principais é a obrigatoriedade de realizar todas as xestións de maneira telemática. “En moitos casos non temos boa conexión a internet”, sinala a gandeira da comarca de Betanzos, “por non dicir que hai moito descoñecemento de como empregar as ferramentas dixitais, non é o meu caso mais hai moitas maiores e é público que somos un sector envellecido”, conclúe. Para Rodríguez, “é moi fácil de seguir o que facemos nas explotacións, non ten razón de ser que teñamos que indicar cada día o punto exacto en que están as vacas ou o xurro que botamos procedente da nosa casa”. Ademais, engade, “non estamos en contra dos controis, todo o contrario, mais deberían ser na explotación”. “As granxas pequenas somos as que mellor coidamos o territorio”, asegura Hugo Martínez, “herdamos a terra dos nosos devanceiros que querémola deixar aos nosos fillos”, engade. Por este motivo, indica que “nunca vou prexudicar a terra, todo o contrario, tento mellorala”. Pon o foco nas normas de fertilización de solos, que tamén centran as protestas nas tractoradas, lembrando que “nós tamén estamos en contra das macro explotacións e das súas verteduras”. SLG e UUAA denuncian perdas que alcanzan 28% nas axudas agrarias da PAC Descoñecemento do territorio “Non teñen en conta as características propias do noso país”, asegura Eva Rodríguez. No seu caso, traballa 45 hectáreas, con 170 referencias catastrais distintas nas que, ademais, ten que separar recintos “segundo teñan árbores ou pasto”. Con todas estas variantes que lle demandan, recoñece que “algo tan sinxelo como facer a solicitude da PAC convértese nunha carga tremenda". Hugo Martínez, por último, demanda axuda da cidadanía. “Está ben que nos exixan que fagamos ecolóxico e coidemos as razas autóctonas mais despois deben ser coherentes e mercar os nosos produtos cando van ao supermercado”, conclúe. O Goberno español defende "as medidas" que aplicou O delegado do Goberno español na Galiza, Pedro Blanco, reivindicou esta terza feira as medidas promovidas polo Executivo estatal para dar resposta ás demandas de agricultores e gandeiros. Entre elas lembrou "o reforzo da Lei de Cadea Alimentaria, a simplificación da Política Agraria Común (PAC), o apoio ao sistema de seguros agrarios, a rebaixa do gasóleo profesional e potenciar a incorporación dos mozos ao campo". Neste contexto, instou á Xunta a "arrimar o ombreiro" e a "asumir a súa responsabilidade" en lugar de "mirar a outro lado". O agro galego exixe en Ourense medidas para a súa supervivencia Apoio do BNG e a Xunta Na mobilización que tivo lugar en Lugo participaron Olalla Rodil e Montse Valcárcel, deputadas electas no Parlamento Galego polo BNG. Rodil afirmou que este sector "é fundamental e estratéxico para a provincia de Lugo e para toda Galiza", e engadiu "é preciso garantir o mantemento da actividade gandeira, cuns prezos en orixe que cubran os custos de produción". Desde a Xunta da Galiza, pola súa parte, o conselleiro do Medio Rural en funcións, José González, asegurou esta terza feira en Pontevedra que a o Goberno galego "comprende" e "está ao carón" das reivindicacións dos agricultores e gandeiros que se manifestan durante esta xornada, mais pediu poñer "o foco" na lexislación europea.