A taxa galega de xeración eléctrica con fontes solar e eólica sextuplica o índice mundial

A enerxía eólica e a solar alcanzaron conxuntamente a cifra récord de 12% da electricidade mundial en 2022, fronte á taxa de 10% de 2021, segundo o último informe Global Electricity Review do think tank Ember. O estudo, que inclúe datos correspondentes a 2022 procedentes de 78 Estados que representan 93% da demanda global de electricidade, sinala que a Unión Europea (UE) xerou 22% da súa electricidade a partir de enerxía eólica e solar durante 2022. A UE xerou 22% da electricidade a partir de fontes renovábeis durante 2022 A Galiza xa cumpre co obxectivo de consumo renovábel que a Unión Europea marca para o ano 2030 Non obstante, a Galiza situase amplamente por riba tanto da cifra récord a nivel global como da taxa a nivel comunitario. Desta forma, no ámbito galego, xerouse en 2022 até 73% da electricidade consumida coa enerxía xerada a partir do vento. A Galiza triplica a taxa de xeración con eólica e solar da Unión Europea A porcentaxe de xeración eólica e solar galega supón máis que sextuplicar a capacidade de xeración eléctrica con estas enerxías a nivel global. Por outra parte, na comparanza co conxunto da UE, a Galiza triplica amplamente a taxa comunitaria. Sete Estados da UE xeraron ao redor dun terzo ou máis da súa electricidade a partir de enerxía eólica e solar en 2022, entre eles o español (33%), o alemán (32%) ou o neerlandés (32%). Así, na comparanza co conxunto do Estado español, a taxa de xeración da Galiza con estas dúas enerxías renovábeis sobre o conxunto da demanda máis que duplica a porcentaxe de enerxía xerada a nivel estatal coas tecnoloxías eólica e solar. As taxas calculadas polo think tank Ember realizan a relación entre a enerxía xerada con solar e eólica sobre o total da produción de cada territorio. Este método obvia a existencia de rexións como a Galiza que destinan gran parte da súa produción ao consumo doutros territorios. Aínda así, se a taxa galega de xeración a partir da eólica e da solar se calcula sobre o total da produción eléctrica do país (43,5%), esta continuaría a ser amplamente maior que a global (12%), que a da UE (22%) ou que a do conxunto do Estado (33%). Ao aplicar o cálculo da produción sobre a demanda no ámbito estatal, e eliminando tamén a influencia da importación e da exportación, a produción con solar e eólica sobre o total de electricidade consumida no Estado español aumenta até a porcentaxe de 37%. Aínda neste caso, a taxa galega de 73% segue supondo practicamente duplicar o índice do conxunto do Estado. O peso das renovábeis é 154% maior que no Estado Tendo en conta todas as tecnoloxías de xeración renovábel e non só a solar e a eólica (como fai o estudo de Ember), a Galiza xerou máis de 100% da electricidade que consumiu en 2022 a través deste métodos de produción. Así, durante o pasado ano xerouse no país 109% da enerxía que foi consumida na Galiza a través de métodos renovábeis, unha taxa que no caso do Estado español ficou nunha porcentaxe de 46,5% da demanda. A xeración hidráulica supón 31% do total da demanda eléctrica da Galiza. Pola contra, a produción con carbón, líder a nivel global, tan só representa 6,4% do consumo. Ao eliminar do cálculo a nivel estatal a produción e o consumo galego, a taxa do Estado español de produción enerxética renovábel sobre o total da demanda eléctrica descende até a porcentaxe de 43%. É dicir, o peso da produción renovábel sobre o total do consumo eléctrico na Galiza é 153,5% maior que no resto do Estado español. O BNG pide unha empresa pública de enerxía "ao servizo da Galiza" Facendo o cálculo sobre o total da produción, a Galiza xera a través de métodos renovábeis 65% da enerxía eléctrica que produce. Unha taxa que no caso do conxunto do Estado español descende até 42%, e que excluíndo a xeración galega caería até unha porcentaxe de 40%. Desta forma, o peso de xeración renovábel sobre o total da produción é 62,5% maior na Galiza que no conxunto do Estado español. A solar é a xeración que máis medra no mundo A nivel global, a solar foi a fonte de electricidade de máis rápido crecemento por décimo oitavo ano consecutivo, aumentando 24% en 2022 e agregando suficiente electricidade para dar enerxía a toda Sudáfrica. Pola súa parte, a xeración eólica creceu 17% en 2022, suficiente para abastecer a case todo o Reino Unido. Segundo os datos do estudo de Ember, máis de 60 Estados xeran actualmente máis de 10% da súa electricidade a partir de enerxía eólica e solar. A xeración de electricidade a partir do carbón supón 36% da produción global desta enerxía, sendo esta a tecnoloxía non renovábel a principal fonte eléctrica do mundo. A pesar deste progreso destas dúas enerxías (e doutras renovábeis), o carbón seguiu sendo a maior fonte de produción de electricidade en todo o mundo, producindo 36% desta enerxía a nivel global no ano 2022. As emisión contaminantes mundiais procedentes da xeración de enerxía eléctrica alcanzaron o seu máximo histórico no ano 2022, cun aumento de 1,3% a nivel global. De feito, a xeración eléctrica con carbón aumentou no mundo (1,1%), o que provocou que as emisións do sector eléctrico se incrementaran en 1,3% en 2022, alcanzando o máximo histórico. O Estado español reduce a importación de enerxía As importacións de enerxía desaceleráronse apreciabelmente no último trimestre de 2022, até rexistrar unha caída respecto ao ano anterior en termos reais, tónica que "se mantén" a inicios de 2023, segundo explicou esta cuarta feira o Banco de España. No seu informe A evolución recente das importacións de bens á luz dalgúns condicionantes, a institución explica que as tensións nos mercados da enerxía provocadas pola guerra de Ucraína impulsaron en 2022 as importacións enerxéticas, debido ás estratexias de almacenamento ante eventuais problemas de subministración e de exportación a outros Estados da UE. Porén, a dinámica cambiou durante os últimos seis meses. O aumento de 29% da produción de enerxía agocha a caída do resto da industria galega En conxunto, as importacións de bens no Estado español creceron en 2022 máis intensamente do que se derivaría da evolución da demanda final e da competitividade polo factor do prezo en termos agregados. O elevado dinamismo das importacións sería o resultado da interacción de tres factores que presentan unha elevada heteroxeneidade entre ramas de actividade. O primeiro deles é o dinamismo das compras ao exterior de enerxía xa mencionado. O segundo é a substitución de produción interior por importacións nas ramas máis intensivas en enerxía, dada a perda de competitividade das devanditas ramas fronte a Estados de fóra da zona do euro menos dependentes da enerxía importada e pola rápida translación dos prezos grosistas da enerxía aos comerciantes polo miúdo. Por último, o dinamismo das importacións responde á orientación da produción cara aos produtos con maior contido importado, nos que as compras ao exterior foron máis dinámicas. A enerxía solar, residual na Galiza A enerxía solar supón unha opción cada vez máis usada para aumentar a autosuficiencia enerxética de vivendas e instalacións públicas e privadas, unha aposta que é eficiente en termos económicos a medio prazo, como demostra o seu emprego mesmo en rexións nórdicas con menos horas de sol. Non obstante, en termos de produción, a enerxía solar segue sendo residual na Galiza, xa que tan só supón 0,17% do total da demanda eléctrica e 0,09% do conxunto da xeración.