SOS Suído Seixo acusa de "falsa transparencia" e dunha "estratexia de márketing extractivista" á empresa da mina de litio de Doade
SOS Suído Seixo reduce a unha "falsa transparencia" e unha "estratexia de márketing extractivista" o anuncio de Recursos Minerais de Galicia (filial do aragonés Grupo Samca) de que pon ao dispor de quen o solicite 8.700 folios relativos ao proxecto que impulsa de Mina Doade, no municipio de Beariz (comarca do Carballiño), declarado como estratéxico por Bruxelas polas súas reservas de litio.
Nun comunicado, esta plataforma contraria á mina critica que a empresa só facilite esta documentación a quen lle facilite os seus datos persoais, algo que reproba. Precisamente, a pasada semana, máis de 230 organizacións veciñais, ecoloxistas e culturais (de máis de nove estados da Unión Europea) solicitaron transparencia e enviaron unha carta aberta á presidenta do Parlamento Europeo, Roberta Metsola, para pedir o acceso aos expedientes de minas que a UE considera críticas, como é este caso.
Así mesmo, SOS Suído Seixo carga contra o "escurantismo" do Goberno galego, xa que "é algo insólito e vai contra a lei que a día de hoxe a Xunta da Galiza só lle facilitase a documentación do proxecto a unha das comunidades de montes hai menos dunha semana", pois "ao resto das comunidades de montes, asociacións e particulares non se lles deu acceso á documentación".
Tamén explica que a pasada cuarta feira varias comunidades de montes reuníronse coa Confederación Hidrográfica Miño-Sil e "confirmaron que xa informaron o proxecto á Administración autonómica". "A Xunta non confirmou que iniciase o trámite ambiental nin nos remitiu esa información", quéixase.
Acusa o Goberno galego de "ocultación de información básica constante" no que identifica cunha "vulneración constante" do Convenio de Aarhus sobre información, participación e xustiza ambiental.
"Fragmentación"
Respecto ao proxecto para a mina de extracción de litio, SOS Suído Seixo alerta de "fragmentación", pois opina que as 17 cuadrículas mineiras das que fala a empresa só supón "o proxecto inicial", cando "recoñecen que ampliarán cara a norte e cara a sur". Tamén se queixa de que agora falan de entre oito e nove explosións diarias cando o anterior proxecto rexeitado eran entre seis e sete ao día.
