Estas son as claves do desembarco das empresas chinesas no mercado galego da automoción: as marcas triplican a súa presenza

As marcas de automóbiles provenientes da China multiplicaron por tres a súa presenza no mercado galego e estatal desde 2021, pasando de oito naquel ano a 23 en 2024. 

Esta maior dispoñibilidade de marcas chinesas de coches xa se está reflectindo no número de vendas rexistradas até rozar os 37.000 vehículos matriculados no período de xaneiro a outubro de 2024 no conxunto do Estado, o que supón unha cota de mercado de 4%, o cal afecta aos resultados comerciais das empresas europeas, como é o caso de Stellantis, con boa parte da produción na factoría de Vigo.

Segundo os datos da patronal de fabricantes analizados por Sumauto –portal especialista no sector da automoción–, os fabricantes chineses con máis matriculacións rexistradas no período foron MG (24.602 unidades), Omoda (5.897), BYD (3.249), Lynk & Co (1.132) e Polestar (506). A estas compañías únese a nova marca do grupo chinés Chery, Jaecoo, que cun único vehículo logrou matricular 313 unidades durante o seu primeiro mes á venda (outubro).

Ademais, no curto prazo, o mercado galego de vehículos continuará recibindo novos participantes procedentes da China, como os recentemente chegados Leapmotor, Xpeng, Jaecco e Dongfeng, aos que se sumarán  en 2025 marcas como IM, NIO, Zeekr e Arcfox, entre outras. 

Ademais da oferta cada vez máis ampla de modelos, o prezo máis accesíbel eríxese como un dos principais condicionantes que está a convencer cada vez máis a un número maior de usuarias. Neste sentido, o prezo do coche chinés máis vendido a nivel estatal, o MG ZS, custa 17.930 euros, sendo 26% máis barato que o vehículo europeo equivalente máis vendido, o Peugeot 2008, de 24.190 euros.

Por outra parte, as marcas chinesas son punteiras en electromobilidade, xa que levan desenvolvendo e perfeccionando esta tecnoloxía desde hai máis de dez anos, o que lles permite cubrir nichos que outros fabricantes se viron forzados a abandonar por diversos tipos de factores, como o da adaptación da súa gama ás normas de emisións contaminantes ou a electrificación acelerada que están a desenvolver na súa oferta de automóbiles.

En adición, algunhas das marcas chinesas son tamén punteiras na fabricación de baterías, como é o caso de BYD, que é o segundo fabricante mundial. Isto supón, por tanto, unha vantaxe competitiva que se traduce en coches cun prezo máis axustado que o das marcas europeas.

Estratexia ante os aranceis

Precisamente esta cuarta feira, o responsábel de BYD na península Ibérica, Alberto de Aza, anunciou  unha "actualización de tarifas" a partir do 1 de xaneiro de 2025, "xa comunicada aos concesionarios", aínda que sinalou que estará "máis en liña coa inflación que cos aranceis" impostos pola Unión Europea (UE) á China.

BYC non Descarta novas fábricas en Europa en función das súas vendas

Con todo, co ánimo de evitar a aplicación dos aranceis á importación de vehículos eléctricos chineses, sinalou que a firma contará "proximamente" con presenza industrial nos cinco continentes nunha estratexia na que a planta húngara de Szeged pretende ser a primeira en fabricar vehículos de maneira íntegra na UE "antes de finais de 2025".

O representante de BYD engadiu que, "de momento", a compañía non ten plans sobre a mesa para levantar novas plantas na UE, aínda que admitiu que o futuro "determinarao a demanda". A este respecto, destacou que "será fácil que os construtores chineses se fagan con 10% de cota de mercado".

Posíbeis novas factorías e fechamento de outras

"No mapa europeo hai xogadores a nivel industrial que gañaron moita competitividade, como Romanía, a República Checa ou Eslovaquia", acrecentou, aínda que engadiu que o Estado español ten un "alto valor industrial" no sector –12% das exportacións da automoción estatal proviñeron de fábricas sitas na Galiza entre xaneiro e xullo de 2024–, polo que dá por feito que o Goberno "de quenda pelexará porque a automoción siga sendo un piar da economía".

De Aza avanzou que a chegada das marcas chinesas terá como consecuencia o posíbel fechamento de até tres plantas europeas de produción de coches e unha reconsideración da estrutura dos concesionarios e puntos de posvenda das marcas. Tamén puxo o foco na futura aplicación, a partir do próximo 1 de xaneiro de 2025, da normativa de emisións para os fabricantes europeos (CAFE), que "se podería levar por diante algunha planta".

A conta da dimisión o pasado domingo do conselleiro delegado de Stellantis, Carlos Tavares, afirmou "estar sorprendido", aínda que sinalou que o grupo automobilístico "está a pasar por un momento tremendamente complicado". "Quizais entendeu [Tavares] que Stellantis necesita un golpe de temón importante", manifestou o directivo de BYD. 

Esta cuarta feira tamén se coñeceu a drástica redución das vendas de turismos en Francia e Italia. Alén diso, a crise da automoción xa azouta varias fábricas da UE, en especial en Alemaña, como as de Volkswagen e General Motors. Isto, de forma indirecta, supón un problema para as auxiliares galegas de compoñentes que realizan vendas a estas empresas. 

Neste sentido, o conselleiro delegado de Volkswagen, Oliver Blume, defendeu esta cuarta feira o plan de axuste de 10.000 millóns de euros proposto pola dirección, que contempla o fechamento de tres plantas en Alemaña, e cualificou de insuficiente o plan sindical de redución de custos valorado nuns 1.600 millóns de euros.

O Goberno español "acelera" o Perte e o aragonés prevé "unha noticia histórica"

Rebeca Torró, a secretaria de Estado de Industria, destacou esta cuarta feira o proceso de "aceleración" na xestión do Perte VEC (proxecto estratéxico para a recuperación e transformación económica do vehículo eléctrico e conectado). Neste sentido, lembrou que supón un investimento público de máis de 3.700 millóns de euros. "Estamos nun punto de aceleración da xestión, con todas as convocatorias xa resoltas ou en proceso de avaliación, fóra da cuarta, que suporá 1.250 millóns máis de investimento para seguir impulsando a transformación cara a unha automoción electrificada", segundo sinalou. 

Paralelamente, o presidente do Goberno de Aragón, Jorge Azcón, sinalou esta cuarta feira que confía en que "nos próximos días" se produza "unha noticia histórica" sobre a xigafactoría de baterías de Stellantis en Figueruelas. Azcón comentou que xa sabía que o conselleiro delegado da automobilística, Carlos Tavares, ía renunciar ao cargo. "Chamoume Stellantis e contoumo", dixo. A relación coa multinacional "é estreita e vén de lonxe", segundo engadiu. 

A confianza do aragonés contrasta coa do seu homólogo galego e compañeiro de partido (PP), Alfonso Rueda, que esta semana recoñeceu "inquietude" tras a dimisión de Tavares e se limitou a dicir que o Goberno galego mantén contactos cos responsábeis da fábrica viguesa para coñecer a súa evolución. A de Vigo é a maior planta de automoción do Estado, mais a xigafactoría de baterías en Aragón –cun investimento de 4.000 millóns de euros– reforzaría a competitividade de Figueruelas fronte ao complexo de Balaídos.