65% da poboación galega consome peixe con menor frecuencia da recomendada

Na Galiza consómese cada vez menos peixe. Malia contar con 4.232 embarcacións pesqueiras que trouxeron aos portos galegos o ano pasado un total de 134.287.109 kg deste produto por un valor de 437.398.236 euros, segundo datos facilitados pola Consellaría do Mar, o seu consumo redúcese cada ano. Coa intención de saber o motivo e cuantificar ese descenso, a Unión de Consumidores da Galiza (Ucgal) realizou entre os meses de febreiro e abril deste ano unha enquisa entre a poboación galega maior de 18 anos e cuxos resultados presentará esta sexta feira no I Congreso Internacional de Consumo en Santiago de Compostela. Até seis días e medio pode demorarse a reparación dalgunhas avarías de telefonía fixa As principais conclusións do estudo, ao que puido acceder Nós Diario, sinalan que só 35% das galegas e dos galegos consomen peixe coa frecuencia recomendada pola Axencia Española de Seguridade Alimentaria e Nutrición (tres ou catro veces á semana). O principal motivo polo que non se consome peixe ou tanto peixe como se debera é o elevado prezo. Ademais, case 7 de cada 10 galegas e galegos considera que a rebaixa ou supresión do IVE do peixe incentivaría o seu consumo. Outro dos resultados do estuda da Ucgal é que, cando se come fóra de casa óptase máis por pedir peixe. Por último, o traballo sinala que 1 de cada 10 galegos non distingue o peixe salvaxe do peixe de cultivo. O secretario xeral da Ucgal, Miguel López, sinala a Nós Diario que “a día de hoxe as cifras aínda serían peores dado o incremento constante do Índice de Prezos ao Consumo (IPC)”. Segundo López, esta situación non acontece só na Galiza, “tamén pasa no Estado e en toda Europa”. Produto caro O prezo actual do peixe está a situar este alimento na faixa dos produtos complicados de consumir e, nalgunhas vivendas, “pode chegar a considerarse de luxo”. Na enquisa atopouse con que hai persoas que aseguran que consomen peixe coa frecuencia que desexan, mais “na realidade as cifras demostran que aínda que quixeran consumir máis, polo incremento de prezo, non o poden facer”. Comisadas en Vigo 25 toneladas de quenlla conxeladas López considera “preocupante” que se se ten en conta a frecuencia de consumo “recomendado” de peixe “estamos moi por baixo do desexábel”. Este dato, co indicativo de ter que facelo como mínimo catro veces por semana, “nunca sobe de tres e máis de 50% consomen peixe como moito unha ou dúas veces por semana, co que iso significa para a saúde das persoas”. A importancia da demanda Procurar explicacións ao aumento de prezo do peixe e a súa baixa compra nun país como a Galiza foi unha das razóns, segundo explica a Nós Diario Miguel López, de organizar este I Congreso Internacional de Consumo en Compostela, que decorre entre hoxe e mañá. “Unha parte importante desta cita está dirixida a coñecer os motivos, aínda que sabemos que os datos que recollemos non dependen exclusivamente dos custos de produción que se elevaron dunha maneira significativa”, indica o responsábel da Ucgal, “é algo que acontece en todo o sector agroalimentario”, engade. Para López, habería que sumarlle “circunstancias de carácter social”. Neste caso apunta ao “coñecemento dun maior ou menor número de especies que empregamos na nosa cociña”. Esta circunstancia crearía certa “tensión” no prezo das que son máis consumidas. Neste sentido, López lembra que nas peixerías galegas hai “moita oferta en relación á variedade mais o consumidor non se decanta por alternativas máis económicas”. Neste tema a Ucgal sinala que traballan desenvolvendo algunhas actuacións para difundir variedades e modos de preparación con eventos que se organizan nas prazas de abastos galegas. O maior porto ilegal de Europa é o de Vigo, segundo 'National Geographic' "Temos que desbotar eses mitos que aínda existen sobre o complicado que é preparar o peixe ou a súa pouca oferta", indica Miguel López, "tamén o tema horario no que se afirma que polas tardes xa non queda peixe", engade. Para conseguilo, desde esta entidade de consumo apelan á implicación de todo o sector que o traballa "desde as confrarías de mariñeiros até a distribución, pasando polas peixarías do país e a propia Administración galega". Ademais, ao responsábel da Ucgal chámalle a atención que en determinados momentos “a volatilidade do prezo é significativa cando concorren circunstancias como as dificultades que ten traballar no mar”. Nese caso, a diminución da oferta explicaría “o incremento significativo que acontece nos prezos”. Decisións fiscais O estudo da entidade galega de consumidoras e consumidores tamén evidencia que, entre a poboación da Galiza, callou a idea de que o Goberno español debería ter adoptado momento algunha medida fiscal para reducir o prezo do peixe no país. “A enquisa que realizamos deixa ben claro que a xente estaría moi satisfeita se se tomasen accións como a que fixo en Portugal de ampliar a variedade de produtos rebaixados fiscalmente”, explica López, “mesmo tamén a posibilidade dunha exención total de tributos ao peixe para consumo durante determinado tempo”, engade. O Goberno estatal fecha a porta a incluír carne e peixe na prórroga da rebaixa do IVE Neste sentido, antonte, un estudo presentado pola USC encargado pola Xunta da Galiza, estimaba que a rebaixa do IVE de 10 a 5% para os produtos pesqueiros para o seu traslado ao consumidor final aumentaría o valor engadido en 28,5 millóns e crearía 5.575 empregos. A demanda da redución deste tributo xa a fixo en varias ocasións o BNG e o PP.