Que concellos non atoparon comprador para ningunha vivenda en anos?
O propio sector inmobiliario recoñeceu o ano pasado, despois da corentena, que se incrementara a demanda de vivenda con máis espazo de lecer fóra das cidades. O interese polas zonas menos urbanas tamén apareceu nas estatísticas oficiais. Porén, non todos os municipios da Galiza atraen as miradas das e dos posíbeis compradores.
Certas zonas do rural, especialmente en localidades costeiras, son atractivas nestes tempos. O seu poder para atraer novas veciñas ou, polo menos, residentes ocasionais creceu ao tempo que a desesperación por poder saír das casas durante a etapa máis ríxida de restricións derivadas do coronavirus.
O ano pasado o mercado inmobiliario reactivouse con especial intensidade naquelas zonas onde había casas con xardíns ou terras e este ano a dinámica vén sendo algo similar, se ben o ritmo de acordos de compra-venda baixou un pouco. Mais sempre mirando a proximidade con cidades ou vilas con todos os servizos.
Iso fai que ao tempo que a poboación aumenta nalgunhas localidades do país, noutros concellos o despoboamento continúe a ser a regra xeral. Os parques eólicos, como din as entidades expertas, contribúen a que o rural perda veciñas e veciños pero tamén o fai o feito de non contar con servizos que hoxe en día se consideran fundamentais perto.
Así, hai municipios nos que o mercado inmobiliario é nulo, ou case. Que se venda ou que se compre un inmoble é noticia. De feito, hai localidades cunha total paralización deste sector económico.
Queres coñecer os seis concellos con menos vendas?
Antas de Ulla
Unha das localidades situadas no centro da Galiza é desas que apenas esperta o interese das potenciais veciñas. Malia o encanto das súas aldeas, este punto do país interior non deu saída a ningunha vivenda no primeiro trimestre do ano, tal e como recolle un informe do Ministerio de Transportes, Mobilidade e Axenda Urbana. No mesmo período do ano pasado, antes de coñecer o virus, as vendas tamén foron nulas, ao igual que as contabilizadas entre xaneiro e marzo de 2019.
Baltar
Neste concello da comarca da Limia non atopou ningunha persoa interesada en mercar no primeiro trimestre nos últimos tres anos. Hai que regresar a 2018 para atopar o rexistro dun acordo e un ano antes asináronse dous. Esta zona próxima á Serra do Larouco estaría satisfeita con nova veciñanza.
Beade
Esta localidade é das menos habitadas da Galiza e tamén a extensión é reducida con respecto a outros municipios do país. Por iso non é difícil crer que comezou este exercicio e os cinco anteriores sen fechar a venda dunha casa. Unha das súas particularidades é que se atopa na comarca do Ribeiro, polo que non é difícil gozar das panorámicas das plantacións de uva.
Beariz
Esta vila próxima ao Carballiño, Boborás e Avión, entre outros núcleos igualmente coñecidos, logrou colocar unha vivenda nos últimos seis exercicios. A páxina web do Concello de Beariz promociona como atractivo turístico varios itinerarios por espazos naturais.
Calvos de Randín
Neste concello tampouco atoparon saída as propiedades en venta entre xaneiro e marzo de 2021, 2020 e 2019. En anos anteriores si houbo mudanzas. A xente que decida mudarse a este concello do interior da Galiza poderá gozar da historia, pois hai até 18 monumentos megalíticos. Destacan, por exemplo, sete mámoas. Algunhas das chaves da súa economía son a gandaría e o sector forestal.
Chandrexa de Queixa
Malia que hai outros puntos do país nos que non se moveu o mercado inmobiliario no inicio deste ano e o pasado, o certo é que Chandrexa é outro dos que ten unhas estatísticas máis negativas a este respecto. Leva seis anos saudando o ano sen acordos de compra-venda, segundo o informe da área de Vivenda do ministerio. Deste lugar das Terras de Trives destacan, no propio departamento de turismo, o muíño dos Pela, a fervenza de Dorelle e a aposta na etnografía.
Pontedeva
Ao igual que Chandrexa, non fechou operacións de cambio de mans de propiedades na apertura dos seis últimos exercicios (contando 2021). A súa poboación, como no resto de localidades, está bastante envellecida e como atractivo para turistas -ou para novas e novos veciños- ten, entre outros elementos, cinco pontes romanas que xa forman parte do patrimonio galego.
Cos resultados destes seis concellos rivalizan, de perto, Abadín, Paradela, Cualedro, Gomesende, Montederramo e Trasmiras.
Aliás, malia a reactivación do mercado da venda de inmobles no rural, no primeiro trimestre do ano en curso non lograron vender nada en Aranga, A Capela, Frades, Irixoa, Tordoia, Láncara, Negueira de Muñiz, As Nogais, Triacastela, Os Blancos, A Bola, Carballeda de Avia, Castrelo de Miño, Castelo do Val, A Gudiña, A Mezquita, Petín, Verea, Vilardevós, Xunqueira de Ambía, Meis e Pazos de Borbén.