As novas restricións publicadas no Diario Oficial da Galiza (DOG) o pasado 26 de xaneiro pola Xunta estabeleceron o fechamento de todo comercio ás 18 horas coa excepción dos que vendan, basicamente, comida, bebida, tabaco, ámbito médico, combustíbel e alimentación de mascotas.
As empresas que distribúen produtos de limpeza, hixiene e desinfección, que estaban incluídos nos diferentes Boletíns Oficiais do Estado (BOE) do estado de alarma estatal e a pesar de estabelecer a obriga de limpar e desinfectar, quedan fóra na norma galega.
Sen poder adaptar horarios
Daniel Rocha, propietario dunha tenda de produtos de limpeza de alta biodegradabilidade a granel na Coruña explica a Nós Diario que non figuran como "comercios esenciais" e saen prexudicados.
O seu comercio está asociado na Galiza a once máis baixo o nome de 4Eco, todo co mesmo problema.
"Dáse a circunstancia de que o DOG cita as palabras limpeza, hixiene e desinfección até 25 veces, mais non considera esenciais os distribuidores", denuncia.
"Córtannos as horas de maior afluencia e a xente ten que ir mercar ás grandes superficies", asegura.
Rocha tentou falar coa Xunta en varias ocasións para pedir poder mudar os horarios mais sen resultado.