As organizacións agrarias apostan pola intervención dos prezos no sector alimentario

A normativa vixente prevé a posibilidade de intervención dos prezos de venda ao público do comercio retallista. Deste forma, a Lei 7/1996, de 15 de xaneiro, de Ordenación do Comercio polo Miúdo, estabelece que "o Goberno do Estado, previa audiencia dos sectores afectados, poderá fixar os prezos ou as marxes de comercialización de determinados produtos, así como someter as súas modificacións a control ou a previa autorización administrativa" nunha serie de supostos concretos. Os supermercados consideran "inaplicábel" un prezo máximo aos alimentos após encareceren 15,4% Así, no caso de que "se trate de produtos de primeira necesidade ou de materias primas estratéxicas", cando se refira a "bens producidos ou comercializados en réxime de monopolio ou mediante concesión administrativa", de tratarse dunha "medida complementaria das políticas de regulación de producións ou de subvencións ou outras axudas a empresas ou sectores específicos", ou ben "excepcionalmente e mentres persistan as circunstancias que aconsellen a intervención, cando, nun sector determinado, se aprecie ausencia de competencia efectiva, existan obstáculos graves ao funcionamento do mercado ou se produzan situacións de desabastecemento", o Executivo estatal pode intervir o prezo de produtos ou as marxes de ganancia que se obteñen dos mesmos. En consecuencia, fica ben claro, xa no primeiro suposto, que o Goberno español ten a posibilidade legal de topar o prezo dos alimentos básicos do cesto da compra, en tanto que son bens de primeira necesidade. Porén, esta cuarta feira, as principais cadeas de supermercados do Estado español consideraron "inaplicábel" unha medida que vaia na dirección de fixar os prezos dos produtos de alimentación, xa que cren que sería "moi mala" para o sector produtor. Os sindicatos agrarios apostan polo control da marxe de ganancia De forma paradoxal, aínda que as principais cadeas de supermercados do Estado español, a través da Asociación Española de Distribuidores, Autoservizos e Supermercados (Asedas) [que integra empresas como Mercadona, Lidl, Coviran ou Dia], argumentaron posíbeis prexuízos para o sector produtor no caso de intervir o mercado da alimentación, as organizacións agrarias consultadas por Nós Diario sinalaron a necesidade de controlar publicamente este sector. Os sindicatos agrarios apoian a intervención Neste sentido, Manuel Dacal, coordinador da Federación Rural Galega (Fruga), explica que non está en contra de que se poña un tope ao prezo dos alimentos básicos, senón "todo o contrario, hai que intervir e esa é unha das opcións, sempre e cando iso non prexudique ao eslavón máis débil da cadea, que é o sector produtor", afirma. O Goberno estatal descarta baixar o IVE do peixe e da carne a pesar da petición do sector "A intervención política da alimentación é fundamental, senón prodúcese a fame ou unha dieta insalubre, polo tanto desde a produción até a distribución o que se necesita é un control exhaustivo por parte das Administracións asegurando que ningún eslavón da cadea especule e que ningún obteña beneficios por debaixo do seu custo de produción", explica. "Iso é o que non se está producindo, a lei da cadea está moi ben no papel mais está moi mal na súa aplicación práctica porque a Administración non quere intervir para que se cumpra e o sector produtor teña prezos que cubran os seus custos", acrecenta o coordinador da Fruga. "A partir de aí chegaríamos até a distribución, na que habería que intervir tamén para evitar a especulación", conclúe. Pola súa parte, Isabel Vilalba, secretaria xeral do Sindicato Labrego Galego (SLG), tamén opina que "debe haber unha intervención desde a Administración sobre o prezo dos alimentos, pois son un ben necesario e fundamental e do que depende a saúde das persoas". "Ten que haber unha actuación para evitar que non haxa malas prácticas, nese sentido temos unha lei da cadea mais está sen desenvolver, precisamente a maior evidencia disto é o que está pasando cos prezos dos alimentos", afirma. "Non debería poder haber marxes abusivos nin inxustificados", acrecenta. A secretaria xeral do SLG alude ao Índice de Prezos en Orixe e Destino dos alimentos [IPOD], no que participan organizacións do sector primario e de consumo, e que indica que "a diferenza media entre o que perciben os produtores e o prezo nas cadeas de supermercados é de 400%". Roberto García, secretario xeral de Unións Agrarias (UUAA), afirma que "se tiveramos un dobre etiquetado no que aparecese o que se lle paga ao produtor e o prezo de venda no supermercado teríamos moi claro que o problema non está no incremento dos custos de produción senón nas marxes de beneficio". As produtoras reclaman dar a coñecer na etiquetaxe o prezo en orixe Polo tanto, di García, "calquera control que se faga sobre as marxes de beneficio abarataría o prezo de distribución dos bens básicos. Eu comparto a idea necesaria de que sobre os alimentos fundamentais para as persoas, e nos produtos do cesto básico inclúo tamén o peixe e a carne, se estabeleza un control sobre as marxes de beneficio para que non sexan abusivos, o que tería sen dubida influencia sobre o prezo final". "Trátase dunha medida que ten razóns sociais e que non produciría ningunha distorsión", salienta. Planas négase a intervir o mercado da alimentación A pesar do que estabelece a lei do comercio polo miúdo, o ministro español de Agricultura, Pesca e Alimentación, Luis Planas, afirmou esta cuarta feira que fixar os prezos dos produtos de alimentación non é legal e non resolvería o problema, xa que, ao seu ver, os que pagarían esa medida serían os sectores da agricultura, da gandaría e da pequena produción industrial. Os alimentos lideraron a suba de prezos nos últimos 12 meses ao encarecer 15,6% Neste sentido, a secretaria xeral do PP e portavoz no Congreso estatal, Cuca Gamarra, exixiu ao presidente do Goberno español, Pedro Sánchez, que rexeite calquera proposta de "intervir a cesta da compra" ante o aumento dos prezos dos alimentos por ser unha medida "comunista". Díaz e Rego apostan polo control dos prezos A vicepresidenta segunda do Gobierno, Yolanda Díaz, mostrouse favorábel á opción de fixar prezos ou intervir no caso das marxes de comercialización de determinados produtos para reverter a tendencia inflacionista dos alimentos. Tamén o portavoz do BNG no Congreso español, Néstor Rego, que en declaracións a Nós Diario apostou polo tope dos alimentos básicos. "Non se pode confiar tan só nas boas intencións e na boa vontade do sector da distribución alimentaria, a mellor opción é pór tope aos alimentos fundamentais do cesto da compra".