Un acordo pioneiro de Muras con Iberdrola compensará economicamente o impacto dos eólicos

Muras (A Terra Chá) é o municipio galego cunha maior implantación e desenvolvemento da enerxía eólica na actualidade, cunha proporción de case un aeroxerador por cada dous habitantes. Son, en concreto, 381 muíños presentes nunha vintena de explotacións que suman perto de 500 megawatts (MW) de potencia instalada. O Concello, dirixido por Manuel Requeixo, do BNG, levaba anos proporcionando axudas económicas á veciñanza para contribuír ao pagamento das facturas da luz das súas vivendas en compensación polo impacto dos parques eólicos, cunhas achegas próximas aos 600 euros anuais. Agora o Concello vén de fechar un acordo con Iberdrola, empresa que explota un deses polígonos, a través do cal a propia Administración local e os veciños e as veciñas serán compensadas economicamente de forma directa. Tras tres anos de negociación, Muras convértese así nunha localidade pioneira neste tipo de acordos na Galiza. “É un avance cualitativo, pois é a primeira vez que se obriga unha empresa con parques eólicos a beneficiar os veciños e veciñas e mais o Concello de forma directa. Ademais, é significativo na cantidade de cartos, que antes era irrisoria”, afirma a Nós Diario o membro do Colectivo de Debate Enerxético Bidán Quico da Silva, quen participou das negociacións co alcalde para alcanzar este acordo que xorde do repotenciamento das instalacións operadas por Iberdrola. O rural que vai polo vento e un plan eólico no aire Este parque eólico conta actualmente con 74 aeroxeradores de 45 metros de altura cada un, cunha potencia unitaria de 0,66 MW. O novo proxecto contempla o desmantelamento completo para a instalación de 11 novas turbinas de 84 metros cada unha. Tras a presentación da solicitude de licenza de obras para o proxecto, o Concello de Muras comezou unha negociación coa empresa e, finalmente, as cláusulas do acordo final de dita negociación estabelecen unha compensación económica por parte do xigante enerxético. Os beneficios para Muras O Concello recibirá cada ano un importe equivalente ao valor económico de 2,5% da enerxía total producida nestas infraestruturas, partindo dos rexistros Operador do Mercado Ibérico de Enerxía (OMIE). O importe resultante repartirase proporcionalmente en función do número de aeroxeradores instalados no termo municipal de Muras. De non alcanzar 2,5% do valor da enerxía producida os 200.000 euros nunha anualidade, o acordo coa empresa decreta que o Concello recibirá sempre, como mínimo, esa cantidade. A maiores, Iberdrola achegará cada ano 125.000 euros fixos para contribuír a mitigar as facturas da veciñanza –contía que se actualizará conforme ao índice de prezos ao consumo (IPC)–, polo que Muras obterá cada ano un mínimo de 325.000 euros. Así, a Administración local aforrará os arredor de 100.000 euros que cada ano reservaba no seu orzamento para sufragar as facturas da veciñanza. A renda dos concellos con máis potencia eólica instalada está por baixo da media galega Ademais, facilitarase a participación da veciñanza empadroada neste municipio nos programas e bolsas promovidos pola Fundación Iberdrola España. Dita participación estará suxeita, en todo caso, aos criterios de selección estabelecidos por esta entidade, que se fundamentan nos principios de transparencia, obxectividade, igualdade e non discriminación, valorando os méritos académicos e profesionais dos candidatos, así como o seu potencial de liderado. Por último, na liña de axudas tamén se estabelece unha lineal destinada a empresas de pequeno tamaño cun importe máximo de 1.500 euros anuais. “Levamos traballando moito tempo nesta idea pola grande ocupación de territorio das eléctricas no noso concello. Foi un proceso moi longo e moi duro, con moitas reunións e altibaixos, mais estamos moi contentos de conseguilo”, explica Manuel Requeixo, alcalde de Muras, en conversa con Nós Diario. Entende que "hai que manter un equilibrio", dado que "non podemos encher todos os montes de eólicos, porque iso repercute na xente". "Con este acordo lembramos que todo é posíbel, só hai que ter vontade", resalta. Pola súa parte, Quico da Silva destaca que o Concello de Muras "é pioneiro en beneficiar os veciños e veciñas de forma directa nas súas facturas, pois o beneficio directo dáse en todos os conceptos". "Forzou [o Goberno local] chegar a unha negociación tan boa para veciños e veciñas de Muras. É un exemplo a seguir”, di. Ao acordo tamén se sumou o Concello de Ourol (A Mariña), que recibirá a parte proporcional dos seus tres muíños do parque. O sector eólico emprega só catro persoas nos vinte parques de Muras “Desde o Colectivo Bidán vimos denunciando desde hai tempo que as concesións eólicas son de por vida non son concesións temporais, como no caso das de auga, que son 75 anos, senón que son para sempre. E iso hai que telo en conta á hora de negociar”, sostén Da Silva en declaracións a este xornal. “O conseguido polo Concello de Muras é un avance que podería facerse noutros concellos, posto que na Galiza temos unha gran parte da densidade eólica do Estado. Somos unha das nacións con máis eólicos”, sentencia. Un caso extrapolábel a outros concellos da Galiza Sobre se este tipo de negociacións son exportábeis a outros concellos da Galiza, o alcalde de Muras, Manuel Requeixo, asegura a Nós Diario que “agora xa sabemos que é algo que se pode facer, mais hai que querer; o proceso é longo pero posíbel”. Quico da Silva coincide con esta afirmación e engade que “é un camiño que deben seguir outros concellos”. “No Colectivo Bidán entendemos que o primeiro que temos que saber é que país queremos e precisamos ter. Ademais, temos que ter en conta cal é a nosa demanda eléctrica. Como exportadores, na Galiza estamos a cubrir con creces as nosas demandas, polo que non sería preciso instalar máis eólicos, ao menos polo momento. Mais hai momentos do ano nos que a enerxía non é suficiente pola alta demanda galega; iso debémolo que ter en conta, traducíndoo na necesidade de avanzar cara ao almacenamento enerxético", engade. A transición enerxética Nun momento de transición enerxética a nivel global no que se pretende avanzar na electrificación da economía, como no caso do automóbil, a demanda de enerxía irá en aumento nos vindeiros anos. “Temos que solucionar iso porque non podemos ser dependentes, temos que saber cubrir as nosas demandas”, apunta Quico da Silva a este xornal.