domingo 18/04/21

Maria Fragela, comerciante: "As novas xeracións non cambiaron no campo galego, seguen defendendo o seu traballo"

Cando María Fragela abriu a súa tenda de alimentación en Narón non sabía que meses despois tería que afrontar toda unha pandemia. O seu proxecto de negocio tivo, desde antes de comezar, moito de emocional e de crer na experiencia propia de xeracións e xeracións vencelladas ao agro. Desde o nome escollido para o proxecto, Do País, até a aprocura de referentes todo sinala respecto pola tradición. Coa aposta pola venda en liña achega a súa proposta mesmo fóra das nosas fronteiras.
Maria Fragela na súa tenda física de Narón con algúns dos produtos galegos que comercializa (Nós Diario)
Maria Fragela na súa tenda física de Narón con algúns dos produtos galegos que comercializa (Nós Diario)

Cal foi o seu proceso para chegar a ter unha tenda de produtos galegos?

Declárome nacionalista convencida! Supoño que o proceso comezou cando era pequeniña e acompañaba á miña avoa Luísa cada sábado á praza de Cedeira. Alí vendía a colleita da semana... non tiña un posto nin nada parecido, cargaba a carretilla, un cesto na cabeza suxeito unicamente por un moído. Gustábame ir con ela e non tardei en decatarme do inxusto e mal pagado que era o seu traballo, traballaba moito, gañaba pouco e aínda por riba, a clientela non escatimaba en pedir rebaixa. Fun medrando e entendín a importancia desa xente, e comecei a ver a calidade, esmero e tenrura coa que traballan.

As novas xeracións non cambiaron no campo galego, seguen apostando e defendendo o seu traballo e as condicións, por desgraza, tamén seguen sendo as mesmas. Desde aquela a idea dunha tenda onde vender os produtos de toda esta xente estivo na miña cabeza. Tiña que facer algo...e este é o meu pequeno proxecto: unha tenda de produtos galegos onde os pequenos son grandes, onde valoramos o seu esforzo e a calidade que iso representa. Iso é Do País, unha tenda da casa.

Antes de abrir a tenda, viaxamos pola Galiza procurando aqueles produtos máis auténticos e respectuosos co medio, cos animais e coa tradición alimentaria do País. Apostamos polos que nos pareceron máis auténticos. E así foise perfilando a tenda ata ter produtos de case toda Galiza.

Cre que a compra de produtos de proximidade gañará a batalla aos que fan miles de quilómetros até chegar a nós?

Creo que aínda falta moito para iso, non podemos criar un porco celta na Serra do Xistral, alimentado por landras e castañas nun espazo óptimo e competir en prezo con calquera macrogranxa. A nosa batalla temos que gañala coa calidade e para iso precisamos recuperar sabores e texturas esquecidas, o poder adquisitivo da xente ten que mellorar, temos que ser capaces de poder comer dignamente, todos temos que poder mercar un chourizo de porco celta e un queixo de Mesía, non podemos deixar que se convertan en produtos exóticos. É a nosa tradición e debemos conservala. Só temos que buscar a maneira de facelo.

A marca "feito na Galiza" atrae mesmo a empresas de fóra. Hai control abondo para evitar enganos?  

Apenas existe control por parte das administracións pero o máis preocupante é a falta de escrúpulos dos empresarios e consumidores á hora de mercar. Non creo que a sociedade actual sexa tan ignorante, simplemente uns enganan e outros deixámonos enganar. Hai produtos que se venden como "galegos" e non teñen nin unha soa materia prima do País. É unha vergoña que consintamos isto, parece non importarnos que se carguen o noso patrimonio. Somos ricos en materias primas e receitas máxicas! Temos que ser capaces de diferenciar o que é noso e o que non!

Que tipo de clientela tes, foi difícil entrar no comercio local?  

Teño clientela de todo tipo, xente maior e xente nova...incluso teño algún cliente de dez anos que gosta de merendar freixós e leite de verdade. Moito me presta velos no parque papando neles e nos rebolos de Maruxío. Algunha xente ve a tenda como algo exótico....estamos moi lonxe diso, somos xente do País. Non resultou difícil entrar no comercio local, tivemos moi boa acollida. A semana pasada abrimos a tenda en liña e agardamos poder chegar a moitos galegos que están lonxe

comentarios