Fin do 'mecanismo ibérico' e da limitación dos beneficios caídos do ceo para as eléctricas en 2024

Desde hai case dous anos estaba fixada por lei no Estado español unha limitación dos chamados beneficios caídos do ceo das compañías eléctricas, unha normativa que deixará de ter efecto a partir do 1 de xaneiro, ao non estar contemplada no decreto anticrise publicado esta quinta feira no Boletín Oficial do Estado (BOE). Desta maneira, o Executivo do Estado español pon fin á limitación marcada nun prezo máximo de 67 euros por megawatt á hora (MWh) nos contratos para a venda da xeración eléctrica das tecnoloxías inframarxinais. Denomínase marxinal a tecnoloxía de xeración eléctrica que oferta a enerxía máis cara nunha poxa concreta e que, por causa do sistema marxinalista deste mercado, determina o prezo que tamén cobran o resto de formas de produción nese momento. Polo tanto, o resto de tecnoloxías, que ofertan nunha poxa un prezo por baixo do máis caro, son as chamadas inframarxinais, as que aínda ofrecendo un prezo menor facturan un custo maior. Esta diferenza, a existente entre a contía que reciben e a que ofertan, é a que se considera como beneficio caído do ceo. As eólicas terán maiores facilidades para desenvolver os seus proxectos: estas son as novidades normativas En marzo de 2022, co obxectivo de facer fronte á escalada de prezos da electricidade que se estaba vivindo, o Goberno español aprobou unha minoración do gas sobre a enerxía contratada a prazo (a través dun contrato que se fai efectivo nun momento futuro) cun prezo de cobertura (que cubra o risco da posíbel suba do mercado diario) na contorna dos 67 euros/MWh. En concreto, esta medida afectaba a todos os contratos novos, así como as revisións e as renovacións. Con iso, tratábase de impedir que as eléctricas vendesen a electricidade xerada das tecnoloxías inframarxinais a uns prezos moi superiores debido á volatilidade existente entón no mercado almacenista eléctrico pola tensión nos prezos do gas e dos dereitos de emisión de CO2. O Executivo español foi o primeiro da Unión Europea (UE) que adoptou este tipo de medidas naquel momento e despois, a UE defendeu estabelecer tamén un custo máximo, aínda que de 180 euros/MWh, ao prezo ao que as tecnoloxías inframarxinais, as que producen electricidade por baixo das produtoras de ciclo combinado de gas como as renovábeis ou a nuclear, podían vender a electricidade no mercado almacenista. Con todo, o Goberno español estima agora que durante os últimos meses o prezo da electricidade reduciuse considerabelmente, o que indica, para o Executivo estatal, unha normalización no mercado eléctrico. Desta maneira, as eléctricas poderán vender xa a súa enerxía a un prezo sen limitacións. Fin do mecanismo ibérico Xunto a esta medida tamén decaerá coa chegada de 2024 o mecanismo 'ibérico', que permitía até o de agora aos Estados español e portugués desacoplar a evolución do prezo da electricidade do custo do gas natural. Ademais, tamén decae a 'excepción ibérica', que non tiña efecto desde finais de febreiro A Comisión Europea xa tiña considerado hai unhas semanas que non era posíbel levar á práctica unha nova prórroga do mecanismo, despois de que os prezos se estabilizasen e ficasen moi por baixo dos niveis que chegaron a rexistrar no ano 2022. A práctica totalidade das paralizacións de parques eólicos ordenadas polo TSXG continuarán malia sentenza do Supremo A denominada 'excepción ibérica', que foi aprobada en xuño de 2022 e que se estende até finais de 2023 tras o acordo alcanzado polos dous Estados co Executivo da UE para a prolongación por sete meses desta medida, levaba sen ter efecto sobre os procesos de casación marxinal nos mercados almacenistas desde finais de febreiro, debido ao descenso do prezo do gas natural por baixo do limiar para a súa aplicación. Beneficios das principais empresas enerxéticas A pesar da limitación dos beneficios caídos do ceo, que decaerá coa entrada do ano 2024, as principais empresas eléctricas que explotan os recursos da Galiza non viron minguados os seus beneficios. Deste modo, Iberdrola, primeira xeradora de electricidade tanto de orixe eólico como de orixe hidráulico na Galiza e con sede fiscal en Euskadi, apunta a un novo récord de ganancias en 2023, tras o xa alcanzado en 2022, despois de anotarse até setembro un beneficio neto de 3.637 millóns de euros, 17,2% máis que no mesmo período de 2022. Galiza ten 4.018 muíños e 37 patentes eólicas; Madrid, ningún, pero 149 patentes Pola súa parte, a madrileña Acciona, segunda en xeración eólica do país, obtivo un beneficio neto de 405 millóns de euros no primeiro semestre de 2023, o que representa un incremento de 3,9% respecto ao mesmo período do ano pasado, un 2022 no que a firma aumentou 109% as súas ganancias, até alcanzar un total de 759 millóns de euros. Ademais, Naturgy, tamén de capital madrileño, segundo operador hidráulico e cuarto eólico na Galiza, obtivo un beneficio neto de 1.045 millóns de euros no primeiro semestre do ano, cun incremento de 87,6% con respecto ao mesmo período do exercicio pasado, practicamente o dobre dos case 500 millóns rexistrados até xuño de 2022. Endesa, propiedade da compañía pública italiana Enel, que fica en terceira posición tanto na produción eólica como na hidráulica a nivel galego, rexistrou un beneficio ordinario neto de 1.059 millóns de euros nos nove primeiros meses do ano. A pesar disto, esta contía supuxo unhas ganancias 35,9% menores que as do mesmo período de 2022. A gasolina marca o seu prezo mínimo de 2023 Por outra parte, o prezo medio da gasolina despide 2023 marcando un novo mínimo anual tras sumar outro descenso semanal, o décimo terceiro consecutivo, e acumular un abaratamento de case 15% desde finais de setembro. Concretamente, o custo medio do litro de gasolina descendeu 0,32% esta semana con respecto á pasada, para situarse en 1,531 euros por litro, segundo o Boletín Petroleiro da Unión Europea. Habería que retroceder a finais do ano pasado, cando aínda estaba vixente a bonificación do Goberno estatal de 20 céntimos por litro para os carburantes, para atopar un prezo máis barato. A gasolina marca 1,531 euros por litro, e o gasóleo custa 1,492 euros Pola súa parte, o prezo do gasóleo encadeou a súa duodécima semana consecutiva de descensos semanais, cunha baixada de 0,6% respecto a sete xornadas antes, até marcar un custo medio de 1,492 euros por litro. Desta maneira, o litro de diésel suma un descenso de 13,1% no seu prezo desde principios de outubro e cae a uns niveis que non se vían desde finais de xullo.