luns 08/03/21

González-Formoso rexeita que Siemens-Gamesa feche nas Pontes mentres abre en Francia

As Alcaldías do PSOE na comarca de Ferrolterra anuncian que convocarán unha mesa co resto de Administracións para procurar unha solución que permita reindustrializar a zona.

O cadro de persoal nunha mobilización o 15 de decembro. (Foto: Europa Press)
O cadro de persoal nunha mobilización o 15 de decembro. (Foto: Europa Press)

O alcalde das Pontes e tamén presidente da Deputación da Coruña, Valentín González Formoso considera “inaceptábel” que Siemens-Gamesa feche a factoría que ten na localidade das Somozas ao tempo que está a montar “unha fábrica de pas de aeroxenerador en Francia”.

Para o representante público esta actitude da multinacional é “a gota que colma o vaso”, dado que  “a consigna é carbón no, renovábeis si, pero o emprego que crean as enerxías renovábeis, que tanto se promete, tampouco”.

González Formoso reflexiona sobre a importancia das políticas económicas ao remarcar que o Goberno francés obriga á empresa a fornecer postos de traballo “se quere instalar alí parques eólicos”, o que fai que marchen do Estado español e da Galiza.

O presidente da Deputación aproveitou a xornada de hoxe para reunirse con alcaldes e representantes dos concellos das comarcas de Ferrolterra, Eume e Ortegal, cos que abordou a desaparición da industria da contorna e falou dun plan para atraer novos investimentos.

Siemens Gamesa marcha e con ela case 300 familias van á rúa”, exemplificou pero aludindo tamén a cuestións como os cambios en Endesa, nas Pontes.

As e os rexedores do PSOE, así como as voceiras municipais dos municipios que non gobernan, acordaron convocar unha mesa na que todas as Administracións aporten as súas ideas para incrementar a aposta da industria no entorno.

Neste sentido o alcalde de Ferrol, Ángel Mato (PSOE), destacou que o “obxectivo é a convocatoria urxente para a reactivación económica das tres comarcas”.

comentarios