Galiza pode perder 200 millóns cos recortes previstos na PAC

Galiza pode perder 200 millóns de euros procedentes da política agraria común (PAC) no novo período (2021-2027) respecto do recibido no actual (2014-2020) se se aplica de forma proporcional aos distintos territorios o recorte previsto, ao redor de 10%, o que, segundo o director xeral de Gandaría, Agricultura e Industrias Agroalimentarias, Silvestre José Balseiros, sería "unha hecatombe" para o sector.

Así se pronunciou Balseiros na comisión de agricultura do Parlamento galego, na que advertiu de que se está "nun momento crucial" e "tremendamente importante en canto ao posíbel resultado" desta política comunitaria.

Neste escenario, sinala, "Galiza está a actuar dunha forma leal", de apoio ao Goberno estatal, e confía en "ser capaces", co respaldo doutros países como Francia, "de darlle a volta a esta proposta e que a definitiva non teña ningunha redución e sexa polo menos a mesma que había até o de agora".

E é que a Xunta, subliñou, non entende que o orzamento comunitario se incremente "e con todo a PAC" sufra "unha redución de 10% aproximadamente". O que si comprende é "que como consecuencia da Covid-19 haxa que facer unha redistribución dos fondos", aínda que o alto cargo da Consellaría do Medio Rural cre que "non debe ser a conta da redución da PAC".

E é que, ao seu xuízo, a pandemia fixo ver "a representatividade e eficiencia" do sector primario, xa que agricultores e gandeiros "souberon seguir producindo nun momento complicado". "Se o recorte previsto de 10% se aplicase de forma proporcional aos distintos territorios, para Galiza significaría unha hecatombe, coa perda de 200 millóns de euros", incidiu.

Por iso, Silvestre José Balseiros mantén a esperanza de que da negociación saian "polo menos as mesmas contías que había até o de agora" e insistiu en que, "por baixo diso, o Goberno de España non debería pasar, e sentirase apoiado" pola Xunta co fin de que "haxa unha repartición xusta e equitativa destes fondos", engadiu.