A Fruga di que Medio Rural beneficia as gandarías industriais de Suprema coa nova normativa de estabulación
Recentemente foi aprobada unha modificación normativa no seo do Consello Regulador da Tenreira Galega, a cal ten implicacións directas para todas as explotacións que producen baixo a categoría da Suprema.
Estas mudanzas normativas, obrigadas por unha resolución da Axencia Galega de Calidade Alimentaria (Agacal) e publicadas no Diario Oficial da Galiza (DOG), implican, segundo sinala a Federación Rural Galega (Fruga), "a obriga de encortellar os xatos cebados acollidos a esta categoría".
"Esta medida vai afectar dunha maneira especial a todas as explotacións que optaran por un manexo extensivo da súa cabana ao verse obrigadas a acometer investimentos para dar cumprimento á mudanza do regulamento, que obriga a estabular os animais de máis de oito meses durante dous meses ou agrupalos en recintos fechados", salienta a organización.
"Tomar cartas no asunto"
Por iso, a Fruga critica a Consellaría do Medio Rural por impor esta medida, que considera prexudicial. En troques, demanda o colectivo, o Goberno galego "ten que tomar cartas no asunto, é preciso facer unha política acorde coas necesidades das gandarías galegas de carne, que contribúen de forma decisiva a manter a actividade agrogandeira en moitas comarcas do país e que son a mellor forma de ter un medio rural vivo e activo".
